Durante Conferencia di Prensa di Gobierno di Aruba dialunsa mainta, Prome Minister Evelyn Wever-Croes a mustra riba e hecho cu Aruba ta na 20 caso positivo y tambe tin un averahe di 3 caso nobo pa dia. E positivity rate ta na 5% riba un averahe di 7 dia. Esaki, Prome Minister ta enfatisa, ta pone cu por bisa cu tin e parti di e crisis di salud domina.
Pa loke ta e campaña di vacunacion ta na 67% di e poblacion vacuna y kier yega 85%. Pa cu esaki lo tin campañanan adicional cu lo bay cuminsa. Den e grupo di esnan di 60+ ta na casi 72% y kier yega na 85%.
“Tur esaki ta pone cu nos ta sigui den e plan di crisis pa loke ta trata e recuperacion pero nos ta keda alerta, vigila y evalua cada tres dia pasobra te ainda tur cos ta mustra cu e cifranan ta bahando. P’esey nos ta traha cu e averahe di 7 dia. Si nos ripara cu e cifranan ta exigi otro atencion mas estricto, nos lo cuminsa cu esey mesora. Aworaki nos ta enfoca riba recuperacion.
Ora mi ta papia di recuperacion mi ta papia di e recuperacion economico y e salud mental di nos poblacion pasobra e pandemia aki hunto cu tur e medidanan a ocasiona hopi presion riba salud mental di nos ciudadanonan.”
Gobierno y Crisis Team a reuni cu Respaldo, AZV y DVG siman pasa y a encarga nan pa bin cu un crisis plan pa con ta bay trata cu e recuperacion di salud mental y den e dianan aki lo mester ricibi e plan aki.
“Nos lo percura pa tin fondonan disponibel pa asina Respaldo, AZV, DVG y otro stakeholders riba e tereno aki por traha riba trece e salud mental den nos comunidad”, Prome Minister Evelyn Wever-Croes a termina bisando.