Den fin di siman Aruba tabata tin 9 atleta cu a participa na e di X Costa Rica Taekwondo Open 2017. Diasabra Nasip Bislip a bringa y a perde 26-4. Joshua Klaber a bringa contra di Merca y a perde 8-0. Angelo Rodriguez a bringa den e categoria di Senior y a logra gana su prome pelea. Den e di dos pelea Angelo Rodriguez a topa cu un monster di Merca cu a pone hopi presion ariba Angelo Rodriguez, e no a duna Angelo Rodriguez ni un momento pa hala rosea y Angelo Rodriguez a perde e pelea.
Diadomingo tabata turno di un di e faboritonan Chiara Petrocchi. Chiara Petrocchi a bringa su prome pelea contra di Puerto Rico y Chiara Petrocchi a lastra Puerto Rico cu un score di 25-5, e pelea a termina door di e 20 punto di diferencia. Den e di dos pelea Chiara Petrocchi a topa cu Faith Dillon for di Merca. Den e prome rond Chiara Petrocchi a bombardia e Mericano y e score a termina 8-0 pa Chiara Petrocchi. Den e di dos rond Faith Dillon a bin bek y e score a termina 12-4 den e di dos rond.
Den e di 3 rond Faith Dillon a bin ta pone Chiara Petrocchi bou di presion y e rond a termina 17-17 y mester a bay den sudden death. Den e intercambio di skop e Mericano a score prome cu Chiara Petrocchi y a logra gana e pelea.
Despues tababa turno di Charrick Winterdaal cu a bin cu hopi briyo y a gana e Mericano cu un score di 12-6. Den e di dos pelea Charrick Winterdaal a topa cu e campeon Pan Americano Pe Gutierrez di Mexico y Charrick Winterdaal a haci tur posibel pa gana e pelea pero e Mexicano tabata mas fuerte cu Charrick Winterdaal y a bringa Charrick Winterdaal pa asina gana su pelea.
Den e chikitonan y e fahanan mas abou Zahyon Thielman a bringa y a suta e Mexicano cu un score di 35-0 y a gana su medaya di oro cu un sonrisa grandi ariba su cara.
Juni Croes no tabata tin e mesun briyo cu Zahyon Thielman y a perde cu un score di 18-4 y mester a keda satisfecho cu su medaya di plata.
Záhyon Klabér mester a bringa contra di Jose Nieto di Ecuador cu nunca a presenta y Záhyon Klabér por a sigui pa e di dos pelea y a topa cu Matias Bessolo Montenegro di Chile.
Záhyon Klabér a bringa na estilo di polis cu ladron y den e prome rond e Chileno a sali delanta cu un score di 4-0. Den e di dos rond e Chileno a tuma mas bentaha y a score 6-2. Den e ultimo rond Záhyon Klabér no a logra di score mas punto y a perde e pelea cu un score di 8-2.
Torres a wordo inscribi den e categoria di Junior faha berde y a haci cu Torres a gana su pelea facilmente cu un score di 18-3 ganando su medaya di oro.
Despues di e evento Albert Thielman kende a coach e team por a wak atras ariba un evento unda cu nan a gana masha hopi experiencia mes y cu wowo ariba e proximo evento internacional.