Den avance di aviacion esaki ta masha positivo mes si mira cu tin hopi desaroyonan cu a cuminsa conoce extra pa Aruba, segun Sra. Ronella Tjin A Sjoe- Croes, CEO di ATA.
E aña aki, pa loke ta e topico di aviacion, sigur tabata un aña hopi fuerte pa Aruba. Manera bisa anteriormente, problema di luho, tin demanda pero unda mas unda pa pone mas avion. Un compliment sigur pa Triple A, cu ta traha man den man cu ATA, pa por acomodo diferente di e avionnan cu kier bin.
ATA a introduci e ruta di Minneapolis, tabata tin un Sun Country y Delta Airlines, cu a cuminsa e aña aki y ta planea pa sigui otro aña. Pa loke ta e parti Europeo, hopi esfuerso a wordo haci pa KLM amplia su servicionan aereo, cual a sosode mei mei di aña pasa, unda cu a logra pa agrega un vuelo aereo pa siman, haciendo esaki 7 pa siman. Nan a dicidi di extende esaki y pa otro aña, nan ta pone pa aña completo. Esey a duna su fruto y tin mas cupo pa yega Aruba di parti di KLM.
Di otro banda, segun Sra. Tjin A Sjoe- Croes, tin e mercado di Inglatera cu lo baha cu un servicio charter y esey ta nifica cu e mercado di Inglatera lo bira menos. Pero tambe tin un TUI (Arkefly) cu lo introduci un vuelo for di Belgica otro aña, asina ta habri e mercado aki mas y mas. Potencialmente tambe tin cu haya confirmacion, cu nan lo amplia e vuelonan for di Hulanda pa otro aña. E parti di KLM ta importante, ya cu e ta un hub pa Europa. Italia, Alemania y Scandinavia tur ta haci uzo di e hub di Amsterdam pa gran parti. Esaki ta duna mas posibilidad pa e mercado Hulandes y esun di Belgica, segun Sra. Ronella Tjin A Sjoe- Croes, CEO di ATA.