E caso di homicidio cu a tuma luga awe den oranan di marduga a laga tur hende den shock. No solamente pa e hecho, pero cu atrobe un hoben ta perde su bida den forma cruel.
E aña’ki ta uno di hopi violencia, unda principalmente hobennan a bira victima. Asina por tuma nota di e diferente accidentenan pisa cu a tuma luga, pero tambe uno fatal, unda e victimanan ta personanan hoben. Dia 21 di april tabatin e accidente fatal riba L.G. Smith Blvd cu a costa bida di Kiven Michael Dania, naci na Aruba dia 5 di januari 2000, pues di 21 aña di edad.
Pero e violencia na Aruba ta mas preocupante riba tereno di hudicial, unda cu den seis luna di aña ya caba tin 5 caso di asesinato. Manera por corda, cu aña a habri cu un asesinato. Den e caso aki e victima Rudy Ras tabata un persona grandi, pero tur e dos sospechosonan ta relativamente hoben. Ras a haya un hinca mortal. Ni un siman despues, dia 6 di januari, tabatin e asesinato di un homber di edad halto, kende tambe a haya varios hinca cu e no a sobrevivi. E agresor tabata un menor di edad.
Den e mesun luna di januari a tuma luga e di tres asesinato di aña. Unda un hoben di 22 aña sinta den auto cu su baby, a haya un tiro den cabes. Den e caso aki tabatin dos hoben tambe deteni. Tur rond di 20 aña.
E di cuatro asesinato a tuma luga dia 16 di april ultimo na Brazil. E hoben Richi Genao Tavares tambe a haya un tiro den cabes. A hay’e tira na suela ta sangra. Un persona a wordo deteni, di 22 aña.
Awo e victima di tiro den cabes tabata Sayuri Petronia, di 20 aña, kende a wordo haya den sala na suela cu tiro den cabes tambe. Sayuri ta ex alumno di EPB San Nicolas y ta yiu di e famoso Mike di Mike Disco y locutor na Massive Radio. Un persona masha conoci no solamente pariba di brug pero rond Aruba.
Pues cinco asesinato y tur tin hoben envolvi, sea como agresor of victima, y den tres di e casonan a uza arma di candela, y dos ta tiro den cabes. Specialista y expertonan ta bisa cu tiro den cabeza ta un reglamento di cuenta of por ta un wega al estilo di ruleta Ruso. Den e ultimo caso aki no tin ningun indicacion ainda di e causa.
Hecho ta cu tin hopi speculacion, e relacion cu dos otro incidente di cual uno a tuma luga recientemente y e otro algun aña atras. Sinembargo mester duna autoridadnan espacio pa sigui haci nan investigacion.
E caso aki a tuma luga den e mesun caya cu riba 30 di mei, 2019, un tata a mata e amigo di su yiu muhe cu machete pa motibo di a viol’e.
Un biaha mas, e team di MasNoticia kier manda palabra di condolencia na famia di e fayecido.