Grace Ashruf a dicidi di haci un donacion na Fundacion pa Hende Muhe den Dificultad despues di a tene su exposicion “Balance” di 42 pintura cu hopi exito den luna di november aña pasa. Ta su custumber di haci un donacion na un instancia cada bes cu e tene un exposicion. E biaha aki, a bira Fundacion pa Hende Muhe den Dificultad.
Grace Ashruf ta un artista local cu a yega di tene exposicionnan na varios partinan di mundo y ciudadnan cosmopolitano manera New York y Miami.
Den e coleccion “Balance”, ta ripiti un tema di un circulo cu ta simbolisa e luna y e solo, cu hunto continuamentente ta presente den nos mundo. Mas aun e circulo ta representa e espirito den nos pa tin un fortaleza interno fuerte cu tin di tuma pasonan pa alcansa nos metanan y e caminda cu nos mester cana pa logranan. Suzette Kock, Presidente di Directiva di Fundacion pa Hende Muhe den Dificultad hunto cu Magaly Maduro e Coordinadora di Fundacion pa Hende Muhe den Dificultad a tuma e donacion for di man di Grace Ashruf den e sala di exposicion.