Desde 2009, DCA, Grupo Corector, Comision Arte di Palabra Aruba y Fundacion Lanta Papiamento, ta organisa e competencia di poesia y storia cortico entre e hobennan di Enseñansa Secundario, Arte di Palabra’.
Y nos ta sigui…nos ta dunando oportunidad na nos grandinan pa nan demostra nan talento door di crea arte cu palabra.
Diamars 19 di juni pa 6:00 di atardi lo bay tuma luga e di dos edicion di “Arte di Palabra 60 Plus” den Cas di Cultura. Nos grandinan lo declama y conta storia cortico di inspiracion propio y di otro autor.
En conexion cu e celebracion di e di 15 aña di Papiamento como idioma oficial di Aruba y Aña di Papiamento, nos grandinan lo sigui promove nos dushi Papiamento. Danki na nan nos Papiamento t’ey ainda manera un clabo. E team di Grupo Nucleo, Fundacion Lanta Papiamento, Cede Aruba, Departamento di Cultura Aruba y Departamento di Asunto Social ta gradici tur participante pa nan aporte na Papiamento y nos ta desea nan tur clase di exito riba diamars 19 di juni, di 6:00-9:00 di anochi. Trio Los Tres lo habri e anochi cu diferente cantica na Papiamento.
Entrada ta Afls 2.00 y e carchinan ta obtenibel riba e dia di e evento na Cas di Cultura of por reserva via cel.(nan): 5651145/5626201/5626602.
Nos ta conta cu bo(so) presencia sin falta! Bin apoya nos adulto clasiconan den e actividad aki di Arte di Palabra 60 plus na Cas di Cultura… Exito na tur e participantenan.