Armand Hessels: Un sistema di control fracasa

0
RBC Juli 2018
Funmiles-2018

Desde comienso di Status Aparte te cu fin di 2017, patronahe politico, un administracion financiero deficiente y proyecto sospechoso ta forma caracteristica importante di gobernacion di Aruba. Esaki a costa Aruba innecesariamente biyones di florin. Pa gran parti a financia esaki pa medio di prestamo (= creacion di debe) y economisacion den departamento importante di gobierno. Como tal, structuralmente tawata trata di malgobernacion. E pregunta ta, con esaki por a tuma luga casi sin ningun estorbo durante mas di 30 aña. Pasobra…como partner di Reino, Aruba tin un sistema di control cu mester percura cu abuso (di poder) y drispidimento di placa (casi) no por tuma luga.
Un tremendo sistema…den teoria!
Nos estado di derecho democratico ta basa riba Trias Politica cu e podernan legislativo (Parlamento), ehecutivo (gobierno) y hudicial (hues). Ningun di e pilarnan aki tin mas poder cu otro. P’esey tin un balance cu ta evita abuso di poder di parti di cualke pilar.
Pa cada tereno di maneho a elabora e sistema aki mas aleu. Pa evita cu na caminda ta abusa di e competencianan, a pone tur caminda sistema di control: e checks & balances. Por ehempel, riba tereno financiero ta basa e maneho riba e programa di gobernacion. Pa ehecuta esaki den practica, ta elabora e intenshonnan di maneho den presupuesto. Mester entrega e presupuesto dentro di un tempo stipula pa ley. Na prome luga Conseho di Consulta (Raad van Advies) ta huzga presupuesto riba su meritonan/implicacionnan huridico, financiero y socio-economico prome cu e ta bay pa discusion pa Parlamento y al fin y al cabo pa su aprobacion.
Durante e aña, Servicio Central di Accountant ta controla si tur entrada y gasto ta tuma luga segun e reglanan di entre otro Ley di Comptabilidad. Despues cu aña a termina, Controlaria General ta controla si ehecucion di e presupuesto a bay segun ley y na un manera efectivo. E ta describi esaki den su cuenta anual y ta pasa esaki pa Parlamento. Parlamento na su turno ta controla si gobierno a cumpli cu su intenshonnan manera describi den su presupuesto. Den caso di desviacion, ta yama e ministro p’e responsabilisa su mes.

Debi na e complehidad di maneho en general y pa estima y/of adapta e consecuencianan di maneho riba terrmino largo, gobierno ta ricibi conseho di instancia importante manera SER, Banco Central, IMF, etc. Na unda ta necesario, e ta tene cuenta cu esakinan den su maneho. Riba dje, Statuut ta duna e garantia cu e sistema aki, como parti integral di bon gobernacion (art. 43), ta funciona debidamente. Pues, cu un sistema asina, ta dificil pa faya. Asina mes Aruba ta den problema pisa. Con esaki por ta?
Un sistema fracasa…den practica!
Problema grandi ta cu e realidad ta completamente diferente. Desde inicio di Status Aparte e sistema aki di ‘checks & balances’ ta faya completamente. Asina e diferente gobiernonan ta viola tur aña atrobe e stipulacionnan di Constitucion pa cu momento y/of forma di entrega presupuesto. Practicamente nunca ta tene cuenta cu conseho di SER, Banco Central, IMF y otro instancia di control. Por lo general,tanto gobierno como Parlamento ta neglisha tur observacion di Conseho di Consulta. Ya caba pa decada, y a pesar di peticin urgente, aña aden aña afo, e instancianan di control cronicamente ta falta personal adecua di manera cu nan no por haci nan trabou di control manera prescribi pa ley. Como consecuencia, desde 1986 Parlamento di Aruba nunca a ricibi un cuenta anual cu aprobacion di accountant y pues nunca por a trata un solo cuenta anual debidamente. P’esey nunca por a controla un solo presupuesto riba su realismo y nunca por a responsabilisa un solo ministro pa motibo di maneho fracasa. Mientras cu for di tur rapport cu cualke instancia a yega di produci, ta sali na cla cu e maneho tawata un fracaso. A pesar di e fracaso (intencional!?) aki cu consecuencia financiero enorme, gobierno di Reino a deha di coregi esaki durante decada.

E caracteristicanan principal di maneho di gobierno tras di otro
Si nos pone tras di otro e caracteristicanan principal di maneho di e ultimo 30 añanan -cu tawatin consecuencia hopi negativo pa salud financiero y socio-economico di Aruba-, nos ta mira un imagen hopi serio. Ta trata entre otro di:
1. Violacion structural di ley (p.e. Constitushon & Ley di Comptabilidad) pa gobierno.
2. Presentacion structural di presupuesto irealista locual ta nifica engaño di pueblo.
3. Legalisacion structural di ley cu a viola y di presupuesto irealistico pa Parlamento.
4. Negligencia structural pa advertencia serio di parti di instancia oficial pa cu administrashon financiero y maneho financiero, economico y social.
5. Negligencia structural pa consecuencia financiero di maneho cu a pone den practica (p.e. en cuanto SVB y AZV).
6. Negligencia structural pa recomendacion importante pa mehora calidad di goberashon locual ta nifica cu intencionalmente a scoge pa mal gobernacion.
7. Falta structural di transparencia (p.e. en cuanto financiamento di partido).
8. Falta structural di responsabilisashon (nunca tawatin un solo cuenta anual aproba pa accountant).
9. Cultura sistematico di manipulacion di informacion y intimidacion (cultura di miedo).
10. Resultado general: negligencia structural di bienestar di comunidad. Esaki ta contra e promesa cu gobernante ta haci na comienso di gobernacion, esta cu nan lo traha exclusivamente pa bienestar general.

Un estado di derecho democratico fracasa
Con tur esaki por ta posibel? Simplemente pasobra e atencion principal di hopi politico pa gran parti ta enfoca riba interes personal y di partido. Esey automaticamente ta trece nos riba e problema principal di nos gobierno di e ultimo 30 añanan, esta un gran falta di integridad. Esey ta sali na cla tambe ora di lesa e raport ‘Seguridad y Integridad na Aruba’ di Servicio di Inteligencia di Aruba. Pero tambe di e rapport di e reportero investigativo Tom Blickman tocante e maffia di droga na Aruba y e rapport ‘Un cuestion di Mentalidad’ di Comision di Berdad, ademas di practicamente tur rapport di Controlaria General. For di tur esaki ta sali na cla cu en realidad e ‘trabou’ di nos politiconan a ocasiona un estorbo grandi den e sistema di ‘checks & balances’ y pues tambe den e balance cu mester tin entre e podernan di e Trias Politica. Como tal, tambe a afecta seriamente e fundeshi di nos estado di derecho democratico.

Comments

comments

C: Heineken
new india