Pa Armand Hessels di Fundacion Gobernacion di Calidad Aruba, tanto AVP y MEP a demostra na pueblo den 16 aña cu nan ta den gobernacion nan so, e no ta bay na fabor di pueblo.
E ta sigui splica cu e dos partidonan aki no tin e capacidad y boluntad pa goberna Aruba na un manera drechi. Pesey tambe den nan rapport, a duna un conseho pa bin cu un tipo di Gobierno, un Zaken/Taken Kabinet cu durante 3 aña cu ta consisti di hende, cu ta wordo scogi den nos comunidad, cu no ta forma parti di partido politico, pa asina elimina e presion electoral riba gobernantenan. Bo ta haya un grupo di hende cu ta wordo escogi via un manera neutral, cu conocemento y experticio riba nan tereno y nan ta bay hiba un maneho a base di un cierto cantidad di tarea. Algun di e puntonan ta por ehempel, pa drecha en todo caso e situacion financiero economico di personal, haciendo uzo den esey di e recomendacionnan di rapport calidad. Den esey Hessels a sigui splica cu a bin na dos proposicion. E unico dos proposicionnan cu e dos partidonan politico a trece den nan existencia pa Gobierno di Aruba. Partido MEP na 1993 te cu 1 aña y mey pasa mas of menos, cu nan ta mira cu e miho solucion, un Zakenkabinet pa Aruba, mientras cu partido AVP a trece un tremendo proposicion pa mehora e calidad di gobernacion na Aruba, via e recomendacionnan di Rapport Calidad. Si uni e dos cosnan ey, e dos partidonan politico como cu nan a causa tur e problemanan na Aruba, ta keda solamente den Parlamento y ta duna sosten y eventualmente un tiki direccion na e mehoracionnan cu mester tuma luga. Dus ta tuma tur eror cu a wordo cometi durante tur e añanan, pone nan riba otro, bin cu solucion.
E grupo di experto ta cuminsa traha riba ehecucion di eseynan. Entre otro tambe, riba un modelo nobo den nos organisacion democratico. Nos partidonan politico, ta e centro di e problemanan. Nan ta causa e problemanan, nan ta e problema y mester cambia esey. Tin masha hopi ehempel na mundo cu ta mira con e organisacion democratico a cambia, segun Hessels.
A puntra Hessels kico p’e ta e miho forma pa nos tin un bon Gobierno pa cual ta keda den nombra hendenan profesional pa por forma un Gobierno.
Hessels ta pro pa un sistema na unda, cu no ta existi partido politico, pero districto na Aruba ta nombra algun hende. Hessels ta pro pa nombra tanto hende homber, hende muhe, pasobra tin diferencia entre nan dos. No solamente fisico, pero tambe den nan mentalidad y tambe cu e organisacionnan importante di Aruba, manera e grupo di sindicato, grupo di dunado di trabao, NGO’s, grupo di hubentud, etc. tambe ta manda dos representante cada un. Cada un cu conocemento huridico y cu conocemento financiero economico, pa asina bin cu un curpa di hende, esta representante di tur instancia na Aruba, cu ta guia, cu ta controla e direccion di e pais, e gobernantenan. Nan ya no ta carga mas e presion electoral, di hende cu kier un trabao, cu kier un tereno, cu kier un proyecto, sino e ta tuma luga na un manera full diferente.
Tin movecion asina tumando luga na varios parti na mundo, hasta na Merca, na Canada, na varios pais di Europa. Aruba no lo ta e prome cu ta bay den un direccion asina, pero e por bira si un bon ehempel. Un ehempel cla, un ehempel cu ta sali for di comunidad mes, pasobra, personalmente, Hessels ta kere cu hende mester cuminsa organisa nan mes, mester bin un movecion civico, manera tambe a tuma luga na otro parti di mundo, unda hende a perde tur nan creencia den e mundo politico, el a finalisa bisando.