Casi tur rapport di CAft y Conseho di Consulta ta mustra riba e necesidad pa no uza ‘suerte financiero incidental’ pa cubri ‘fayo structural’. Un frase simpel cu hopi sabiduria. Pero kico esey ta nifica di berdad y pakico ta ripiti e conseho ey te fada?
Fayo structural
Gobierno consecutivo di color politico alternativo a gasta ‘structuralmente’ mas placa di locual a drenta. E motibo principal p’esey tawata nombracion di mucho personal. Hende cu a nombra como recompensa pa nan ayudo den campaña, no a keda solamente durante gobernacion di ‘nan’ partido, pero te cu nan pensioen. Esey a pasa durante tur gobernacion di tur partido politico. Di e manera aki, e aparato gubernamental a bira mucho grandi y pago di esey tawata un gasto fiho (= structural) y hasta creciente riba presupuesto. Aña aden, aña afo. Como consecuencia, specialmente esaki practicamente semper a causa fayo presupuestal. A cubri e fayonan aki mas tanto cu ‘prestamo consumptivo’. Pasobra no a uza gran parti di e prestamo pa inversion cu a lo largo lo produci algo pa Aruba, sino pa paga salario (esta gasto coriente pa ‘consumo’). Tur e prestamonan aki hunto a percura pa e crecemento continuo di nos debe nacional. E miho manera pa limita mas crecemento di e debe ta pa limita e ‘gastonan structural’ mas grandi. Esey ta nifica specialmente cu lo mester tuma menos personal y cu lo elimina departamento y personal innecesario. Asina lo reduci e gastonan di personal ‘structuralmente’. Consecuentemente, fayo presupuestal lo transforma den surplus den presupuesto. Esey lo permiti pa cuminsa paga e debenan.
Suerte incidental
De bes en cuando pais Aruba sa ricibi inesperadamente mas placa cu normal. Esey por ta pa motibo di capital cu tin hopi tempo para pero di un momento pa otro a bin disponibel. Of pasobra a bende un compania di gobierno cu ta genera entrada na e momento ey so (= incidental). Of simplemente pa motibo di un triki di contabilidad manera a pasa na 2015 cu e ‘regalo’ pa gobierno di Afl. 60 miyon di parti di SVB, cu su mes no tawata den un posesion financiero di gaba. Solamente den e milenio nobo aki, ta trata den apenas 15 aña di mas o menos Afl. 1 biyon (mira e tabla). Den caso cu lo ta tin un administracion financiero drechi, esaki lo a bin disponibel na beneficio di henter comunidad. Den algun caso, e suertenan incidental aki a percura pa transforma un menasa serio di fayo presupuestal di un momento pa otro den un surplus. Di biaha e partido ‘responsabel’ a maluza esaki pa haci propaganda extenso cu e surplus ta danki na su ‘maneho responsabel’.
Bista di e suertenan incidental principal, conoci publicamente desde 2000
# AÑ SUERTE INCIDENTAL Afl. MOTIBO DI E SUERTE INCIDENTAL SURPLUS/FAYO PRESUPUESTO Afl. DESPUES DI INCLUI E ‘SUERTE’
1 2001-AVP 306.900.000,- Calculacion nobo di interes APFA → parti di e debe a cay afo (mientras cu APFA a perde hopi reserva!) + 208.300.000,-
2 2003-MEP 249.100.000,- Independisacion di SETAR + 65.700.000,-
3 2008-MEP 200.000.000,- Entrada pa motibo di benta di Plant Hotel + 50.000.000,-
4 2010-AVP 115.000.000,- Acuerdo special (‘dading’) cu Valero Fayo mas abou
5 2015-AVP 60.500.000,- ‘Regalo’ di SVA (premie di trahado!) pa gobierno Norma di fayo OK
6 2016-AVP 27.000.000,- Settlement payment Valero Norma di fayo OK
7 2016-AVP 40.000.000,- Benta Fuels Marketing & Supply (Valero) No a keda realisa!
8 2018-MEP 40.000.000,- Dividendo RdA*, ATA, Utilities Fayo mas abou
TOTAAL 1.038.500.000,- Maluza pa tapa ‘fayo presupuestal structural’ na luga di haci inversion productivo
* Segun Caft, entrada pa motibo di dividendo di parti di RdA (Refineria di Aruba) ta sumamente dudoso. Aruba no a ricibi ningun pago pa motibo di e Settlement Sum, ni di e capital di accion di FMSA, ni di e entradanan di lease pa uzo di e tereno di e refineria cu si a pone den presupuesto 2017. P’esey tambe a dicidi na december 2017 pa considera e creditonan aki como no-cobrable y pues como placa perdi. Riba dje no tin cuenta anual disponibel di añanan 2016 y 2017 mientras cu RdA ya caba a laga sa cu e mester presta placa pa por paga e accionnan di FMSA. Segun minFin, RdA ya caba a haci un prome pago mientras cu e restante lo sigui segun skema den curso di 2018.
Mala suerte den caso di suerte
Suerte incidental grandi a percura den tempo dificil pa gobierno por a cera e aña sin mucho problema grandi, esta sin mucho necesidad pa busca prestamo dificil. Lamentablemente den e proceso ey a tira masha hopi placa afo. Esey tawata specialmente pa motibo di nombracion/mantencion di personal innecesario/di mas. P’esey tambe a neglisha di haci coreccion necesario di e maneho gubernamental dañino. Consecuentemente, e suerte cu gobierno tawatin cada bes atrobe cu ‘suerte incidental’, en realidad tawata hopi mala suerte pa comunidad. Pasobra por a sigui mantene situacion dañino (y costoso!) pa mas tempo. Esey lo resulta cu pa hopi aña mas, structuralmente comunidad lo mester sigui paga cantidad enorme di placa (tira afo). Y no tin mucho speransa cu por sigui conta cu hopi suerte incidental. Ta parce cu e posibilidad ey structuralmente ta cabando. Pa comunidad ta di spera cu esaki por conduci na busca y ehecucion di solucion structural.