BUENOS AIRES, Argentina – Argentina ta prepara pa e lucha contra griep cu e inicio di e distribucion di 12 miyon di dosis di vacuna, fabrica den un laboratorio cu capacidad pa abastece henter Sur America.
E laboratorio, ubica den e localidad di Garin y perteneciente na e empresa Sinergium Biotech, di e grupo Insud, ta dispone incluso di e tecnologia adecuado pa fabrica e vacuna di Zika encuanto esaki wordo proba y certifica.
Cu motibo di e inicio di e proceso di distribucion di e dosis na henter e pais, ta duna cara na inicio di e campaña oficial di vacunacion dia 1 di April, e planta di Insur a wordo bishita diaranson pa e minister di Sanidad Argentino, Jorge Lemus, compaña pa e titularnan di e mesun cartera di varios provincia y di e presidente di Insur, Hugo Sigman.
E vacunanan ta homologa pa e Administracion nacional di Medicamento, Alimento y Tecnologia Medico (ANMAT), cual certificacion ta reconoci pa tur e paisnan Sur Americano excepto Brasil, loke ta permiti produci y distribui di inmediato a medida cu e encargonan nobo keda produci.
Ademas, ta certifica dilanti e agencia regulatorio Norte Americano “Food & Drug Administration” (FDA) y e “European Medicines Agency (EMA).” Hugo Sigman a resalta, den declaracionnan na Efe, cu e laboratorio aki, caminda cu ta produci otro tipo di vacuna den aliansa cu multinacionalnan di e sector farmaceutico, garantisa, pa su capacidad di produccion, e necesidadnan di e poblacion Argentino y di e paisnan limitrofe den casonan di emergencia.
“Esaki no semper tabata asina, ya cu den e epidemia anterior di griep, Argentina no a conta cu vacuna, manera cu ningun pais a conta den e vianan di desaroyo, pa loke e planta aki tin un balor strategico hopi importante,” Sigman a afirma.
Sigman a confirma cu e aña aki lo cuminsa na traha, tambe na Garin, un planta nobo di Sineergium Biotech, cu un inversion di entre 50 y 60 miyon di dollar, cu ta premira pa ta cla na 2018 pa cuminsa produci un vacuna contra griep di e tipo recombinante.
E vacuna nobo recombinante aki, cu ta wordo haci cu un tecnologia cu unicamente dos empresa a mundo ta dispone di dje (un Mericano y otro Hapones), lo tin e bentaha di ta di miho calidad y di permiti reacciona hopi lihe dilanti un cambio.
Sinergium Biotech ta un di e integrantenan di e consorcio internacional cu actualmente ta desaroyando e vacuna contra e virus di Zika, proceso cu lo cuminsa den e proximo lunanan den estudionan clinico di fase I den humano.
E desaroyo por demanda entre cuatro y cinco aña mas te cu su aprobacion definitivo, tras cual por wordo elabora entre otro luanan, den e planta di Insud di Garin. “Pa nos ta un orguyo cu tin un laboratorio Argentino cu ta trahando riba e vacuna di Zika, mescos cu e posibilidad di dispone di dje y pa e sali di nos propio laboratorionan”, minister Lemus a bisa den declaracionnan na Efe.
Sinergium Biotech ta un compania specialisa den e investigacion, e desaroyo, e produccion y e comercialisacion di vacuna y medicamentonan biotecnologico di complexidad halto. Ubica den e localidad Bonaerense di Garin (38 kilometer noordwest di Buenos Aires), ta posee un superficie di 20 mil meter cuadra, tin un capacidad di produccion anual di mas di 30 miiyon di unidad di vacuna y productonan biotecnologico.
Fuente: http://www.eltiempo.com