Ministerio di Enseñansa hunto cu Departamento di Enseñansa ta presenta e di dos edicion di e proyecto Appel di Oro | Premio Nacional di Excelencia den Enseñansa na Aruba.
Despues cu durante cuater aña consecutivo (2011-2014) a organisa e proyecto Maestro di Aña – un premio di reconocemento pa e Maestro di Scol, aña pasa (2015) a scoge pa amplia e proyecto pa duna reconocemento na mas actor cu ta importante pa enseñansa.
Consciente di e balor di e trabou den enseñansa y e reconocemento cu e merece, e proyecto a nace cu e meta pa duna atencion na e cosnan positivo cu ta sosode na scol y den klas, duna reconocemento pa e trabou den enseñansa y ilustra y stimula enseñansa di calidad.
PARTICIPACION
Appel di Oro ta un premio cu ta rindi honor y reconocimento na tur esnan cu ta desplega excelencia den nan trabou diario den enseñansa.
Participacion na Appel di Oro ta habri pa tur scol di Enseñansa Primario, Enseñansa Secundario, Enseñansa Special y Enseñansa Superior reglamenta na Aruba.
Cu e Premio Nacional di Excelencia den Enseñansa lo duna reconocemento den e categorianan di: Proyecto Escolar (Proyecto di Innovacion), Maestro, Dirigente (Cabesante, Director di Scol, Rector of Unit Manager), Actor di Sosten (Mentor, Intern Begeleider (IB), Remedial Teacher (RT), Prisma leerkracht, Begeleidingsleerkracht of Klassenassistent), Newcomer of the Year (Maestro, Dirigente of Actor di Sosten nobo) y Lifetime Achievement Award (Maestro, Dirigente of Actor di Sosten pensiona).
Henter comunidad: alumno, studiante, mayor, coleganan maestro y/of dirigente di scol, ta bonbini pa nomina un persona of proyecto escolar pa Appel di Oro 2016.
Pa haci esaki mester acudi na e website Enseñansa Aruba | ea.aw pa yena e formulario di nominacion y describi en corto pero concreto pakico bo kier nomina e persona of proyecto.
E temporada di nominacion pa aña 2016 ta core te cu dia 19 di September 2016.
Dia 28 di October 2016 durante un evento special lo haci entrega di e Appel di Oro na e diferente ganadornan den cada categoria.
Minister di Enseñansa Michelle Hooyboer-Winklaar ta invita tur esnan cu tabatin un experiencia excepcional cu un miembro di e personal di nan scol of den pasado como studiante na un of otro scol, pa nomina e persona aki pa e premio Appel di Oro. E proyecto Appel di Oro ta un oportunidad pa reconoce esnan cu ta destaca den enseñansa, esnan cu ta contribui na y representa excelencia den enseñansa, es decir, “Nos Heroenan di tur dia”.
Pa cualkier pregunta relaciona cu e proyecto Appel di Oro por tuma contacto cu sra. Sharine Croes na telefon 528-3415 of via email [email protected].
Pa mas informacion por acudi na na nos website www.ea.aw/appeldioro y sigui Enseñansa Aruba | Education Aruba riba Facebook of Twitter pa keda na altura di e proyecto aki y otro informacion relaciona cu Enseñansa na Aruba.