E uzo di airco no ta wordo considera un luho, pero mas bien un necesidad pa nos muchanan no ta bay scol pa haya les den calor. Parlamentario pa fraccion di RED Democratico, Sr. Ricardo Croes ta amplia ariba e tema aki.
Airco ta un necesidad pa tur hende, y no solamente alumnonan, pero pa ehecuta esaki tin mester di placa y pa cu esaki Sr. Ricardo Croes a expresa di forma enfatico cu e gobierno di coalicion actual a hereda un situacion caotico financieramente, y asina mes ministernan ta evaluando, cual lo ta e posibilidad pa logra cumpli cu e necesidad aki.
Sr. Ricardo Croes bisa tambe cu no ta solamente airco pero tambe tin scolnan cu tin mester renobacion, plafond, servicio di internet y diferente materialnan entre otro y pa cu esaki Minister di Educacion ta bezig riba e tema y hunto cu apoyo di e parlamentarionan cu tambe ta participa y ta tuma nota di e problematica y por duna cierto conseho pa yuda riba esaki.
E Comision Permanente di Enseñansa ( Vaste Commissie Onderwijs) ta tuma tempo y ta haci pregunta, pa wak con di un manera of otro, participa na duna cierto consehonan. Ariba e tema di airco, e comision no tin nada cu nan por bisa, pero solamente puntra of conseha. Pero ta di warda ariba e minister kico e ta bay haci of kico ta su prioridadnan.
Otro punto cu Parlamentario Sr. Ricardo Croes trece dilanti ta e apoyo na tur instancianan cu lo por a bini cu ideanan productivo y creativo de relacion cu caso di implementa uzo di energia solar na scolnan caminda cu Elmar tambe lo por probecha di e uzo di esaki pa keda draai e comercio di energia den un forma mas economico pa comunidad .
Energia solar lo ta un tema cu sigur gobierno lo mester sinta papia riba dje siendo esaki lo tabata un di propuesta di e partido Red den campaña, caminda cu Aruba lo por duna e ehempel rond di e mundo y den Caribe unda lo tin 3 fuente di energia natural awa, biento y solo, lo por cuminsa baha e gastonan den parti di energia anto disminui e uzo di gas cu petroleo caminda cu tambe lo por scapa den materia di polucion y alabes contribui na medio ambiente, segun Sr. Ricardo Croes, parlamentario di partido RED.