Apertura virtual di Centro pa Hoben y Famia

Centro pa Hoben y Famia ta un centro cu un concepto unico unda diferente instancianan ariba tereno preventivo a uni pa traha ariba un forma integral pa ofrece comunidad un ONE STOP SHOP pa ricibi informacion, sosten y guia di diferente instancia hunto den cuadro preventivo.
Na 2018 Sociaal Crisis Plan a cuminsa cu e meta pa bin cu un sistema nacional di proteccion pa mucha y hoben. Asina a adopta y a subsidia e plan di ehecucion di e Comicion Vision Pedagogico Aruba como parti di e programa.

Asina a yega na e concepto di un Centro pa Hoben y Famia. Un Centro cu ta traha preventivamente y ta duna sosten necesario na e mayor y tur educador cu ta desea informacion y guia pa asina nos por lanta nos futuro generacion den forma un sano. Tambe lo brinda muchanan y hobennan charlanan y workshops pa traha riba nan desaroyo personal.

E siguiente instancianan ta forma parti di e Centro pa Hoben y Famia cu ta: Departamento di Asunto social, Tienda di Educacion, Wit Gele Kruis, Fundacion Respeta Mi, Fundacion Pa Nos Muchanan, Fundacion Anti Droga Aruba (FADA) y e co-partnernan ADRA, Telefon pa Hubentud, Heart Centered Leadership Foundation y Famia Planea Aruba, cu ta trahando hopi di serca cu Centro pa Hoben y Famia. Banda di esaki tin un plataforma di mas instancianan cu ta sostene y traha hunto cu Centro pa Hoben y Famia ariba tereno preventivo entre otro; Veiligheidshuis, Voogdijraad, Respaldo.

Grupo di meta cu Centro pa Hoben y Famia ta enfoca ariba ta mucha, hoben, mayornan y educadornan. Meta di Centro pa Hoben y Famia ta informa, educa, sostene y guia e mayornan y educadornan ariba e tema di lantamento di mucha y hoben. Centro pa Hoben y Famia ta duna informacion via telefon y social media. Tambe por yega na Centro pa Hoben y Famia durante e orario di oficina. Ta organisa charla, curso, workshops, trayecto di guia, via programa informativo na tv, organisa webinars, bay scolnan pa educa, sostene y guia muchanan y hobennan den nan desarroyo personal.

Por yega na Centro pa Hoben y Famia durante oranana di oficina di 8’or di mainta te cu 5’or di atardi y ta situa na Sabana Blanco 68 C (ex-Acer Building na Wayaca). Pa mas informacion por tuma contacto na 528-1200 of bishita e pagina di Facebook.

Comments

comments