Diaranson mainta, Minister di Enseñansa, Sciencia y Desaroyo Sostenibel dr. Armando Rudy Lampe tawata presente na e apertura oficial di e ‘Greenhouse’ na Scol Caiquetio. Den e ocacion aki tawata presente diferente stakeholders cu a adopta Scol Caiquetio. Scol Caiquetio pa e motibo aki tin e instancianan aki den nan curason.
E actividad a hiba e nomber “Ban planta un simiya awe, pa nos por cosecha mayan”. Durante e apertura tawata tin diferente oradornan cu a entrega palabranan di encurashamento pa e scol. Tawatin presentacionnan bunita cu poeisa y canto. Tambe a hiba palabra Fundacion STINAFO cu ta e instancia cu a yuda financieramente. Fundacion STINAFO ta un instancia estableci na Hulanda.
Despues cu e greenhouse a wordo bendiciona y e sinta a wordo corta, Minister Lampe a duna un discurso cortico pero hopi elocuente. E mandatario a agradeci tur esnan cu di un forma of otro a contribui pa por yega na ‘Nos Hofi’ cua ta nomber di e ‘greenhouse’. Tambe el a gradici Fundacion STINAFO, mirando cu ta hopi dificil pa Gobierno por financia proyectonan asina y sigur Gobierno ta contento ora cu sector priva coopera na bienestar di nos muchanan.
Tur esnan presente a admira e ‘Nos Hofi’ y a keda hopi contento con nos muchanan ta desaroya nan talento pa logra algo asina bunita.