Cu grato placer Stichting Rancho ta extende un invitacion na e Apertura Hanch’I Kalki. Cu e apertura Stichting Rancho ta culmina cu e prome fase di e Proyecto Adopt an Alley, dia 31 di Augustus. 7pm Tambe BASHA foundation ta organisa un Poetry Night den e Hanch’I Kalki pa asina finalisa e Apertura.
Cu e proyecto aki Stichting Rancho kier involucra compania y organisacionnan den e mantencion y conservacion di e bario di Rancho. E nomber ‘Adopt an Alley’ (adopta un hanchi) ta bin di e meta di e proyecto, cual ta pa organisacion y companianan contribui na e conservacion di e hanchinan den Rancho. E obhetivo di e proyecto Adopt an Alley ta pa duna e hanchinan den Rancho nan debido atencion, pa midi e balor historico, pa documenta e historia di e hanchinan aki, y pa informa e publico tocante e historia y e futuro di e hanchinan. Pakico?
E hanchinan di Rancho ta mustra descuida pa motibo di sushi, tiki ilumimacion y hopi biaha ta ilegalmente cera pa e habitantenan. Consecuencia cu e hanchinan no ta atractivo pa e bishitante. Rancho no tin conexion pasando door di e cayanan. Lo cambia e spiral di deterioro ora duna e bario pa medio di e Perlanan su identidad bek y trece conexion cu Schoenerhaven. E ruta di cana den e hanchinan y tur e (futuro) partinan nobo di e plan ta mustra e calidad y potencial di Rancho. Un bario historico di piscado yen di bida conecta cu e Waf.