Apertura “Caribbean Ties” Aruba diaranson dia 22 di mei 2019 na Museo Arkeologico

Museo Arkeologico, Fundacion 1403, NEXUS1492 y Ministerio di Cultura tin e honor y placer pa invita un y tur pa e apertura di e exposicion internacional “Caribbean Ties” Aruba. Dia 4 di mei a habri e prome exposicion internacional di “Caribbean Ties” na Republica Dominicana, y ta sigui habri e exposicion aki na diferente isla den Caribe durante e luna di mei, di cual e apertura di Aruba lo tuma luga diaranson dia 22 di mei pa 6.30 or di anochi na Museo Arkeologico Aruba na Schelpstraat 42.

E exposicion Caribbean Ties ta un colaboracion entre e proyecto NEXUS 1492 y diferente instancia di diferente pais den region Caribe, como tambe cu MUSEON na Hulanda. E proyecto di investigacion importante NEXUS 1942 di Universidad di Leiden a haci cu diferente instancia den paisnan den Caribe, di cual entre otro NAMA di Aruba, a haya e oportunidad unico pa haci investigacionnan profundo, cu profesionalnan den diferente ramo di experticio y a duna e accesibilidad na metodonan di investigacion cu normalmente ta fuera di alcance di Aruba. E proyecto di NEXUS 1492 tabata dirigi riba e historia indigena di e paisnan Caribense aki di e periodo prome cu Columbus pa asina por conta e historia Amerindio for di punto di bista di e hendenan indigena y no manera cu nos conoce for di buki di historia skirbi for di punto di bista di e Europeanonan.
For di e investigacionnan aki a sali hopi informacionnan y a nace e idea pa bin cu un exposicion internacional temporario cu lo habri e aña aki den e luna di mei rond di e fecha di Dia Internacional di Museo, cual ta 18 di mei, na diferente pais den Caribe cu a participa den e proyecto NEXUS 1492 pa asina mustra publico algun di e resultadonan di e investigacionnan aki, y subraya tambe tur e similaridadnan cu tin den Caribe cu ta un resultado di nos herencia comparti (‘shared heritage’). Pues e idea pa “Caribbean Ties/ Lasonan Caribense” a nace y ta birando un realidad.
NAMA y F1403 ya for di hopi aña tabata tin un idea pa bin cu un ‘traveling exhibit’ temporario den Caribe cu e mesun enfoke, y na aña 2012 a organisa un Think Tank hopi exitoso na cual diferente partner den e region di Caribe a participa y a brainstorm hunto pa ideanan con un exposicion asina lo mester ta hinca den otro y con e lo por funciona pa diferente pais den Caribe. ‘Lord Cultural Resources’ a guia esaki y a produci un rapport cu e resultadonan di e Think Tank aki, pues NEXUS 1492 un uni forsa cu NAMA y F1403 y entre otro e rapport aki a yuda pa yega na un concepto pa e exposicion “Caribbean Ties/ Lasonan Caribense”.
Museo Arqueologico Nacional Aruba, Fundacion 1403, NEXUS1492 y Ministerio di Cultura cordialmente ta invita henter pueblo di Aruba pa e apertura di “Caribbean Ties” Aruba riba diarason dia 22 di mei proximo. Keda pendiente pa mas informacion tocante e exposicion aki! Sigui nos riba facebook Archeo, National Archaeological Museum Aruba y Fundacion 1403.

Comments

comments