Diaranson pa 8’or di mainta ta drenta haf di Aruba Celebrity Millenium. E ta e prome barco crucero cu ta bolbe Aruba despues di mas cu un aña cu e mercado aki a cera su portanan debi na e pandemia di Coronavirus.
“Despues di un aña y tres luna desde cu Aruba tabatin e ultimo barco crucero den haf, ta yega Aruba otro crucero,” Marc Figaroa, director di APA a duna di conoce.
Esaki ta e prome crucero cu a sali for di Caribe, saliendo for di Sint Maarten y awe ta na Barbados pa mañan tuma direccion di Aruba. “Tur cos ta cla yama bon bini na e cruceronan bek na Aruba.”
E inicio ta uno slow, segun Figaroa debi na diferente factor. Aworaki Departamento di Salud di Merca ta den discusion (disputa) cu estado di Florida cu inclusive a yega te den Corte pa por habri e hafnan di e ciudad ey pa barco crucero. Unabes cu Miami habri, por mira y sinti un comienso mas acelera pa Caribe y Aruba.
Maneho di Haf ta segun reglanan local di DIVG. Tur pasahero y tripulacion ta vacuna, y a pasa e dos simannan despues di e ultimo dosis. Y nan mester a haya vacuna cu ta aproba door di FDA. Tur esnan cu ta opera riba tereno di waf tambe mester mantene su mes na reglanan di DVG.
Pa APA e ta un comienso nobo den e recuperacion economico cu yegada di e barco aki cu un poco menos di 900 pasahero.