Aruba Ports Authority pa basta aña caba a bin ta dunando su aporte na e ambiente di fin di aña, tumando na su encargo decoracion di un di e tantisimo rotondenan cu tin rond di Aruba.
Durante e ultimo añanan APA a envolvi su mes cu e proyecto di decoracion di rotonde. Algun aña atras e empleadonan di APA a crea un ambiente unico, creando un mini barco crucero tur ilumina mey-mey di e rotonde.
E biaha’ki e tema ta completamente di Pasco, unda por mira un bunita kerstboom grandi y na top e strea di Belen. A percura pa un bunita decoracion di e material di Pasco poni cu e matanan ya existente riba e rotonde, creando un ambiente festivo.
Mescos cu e donacion cu APA a haci na Fundacion pa Nos Muchanan, ta envolvi nan empleadonan den e preparacion y ehecucion di e plan pa decora e rotonde. E intencion ta pa crea un ambiente unda cu famianan pasando den e area di e rotonde aki, riba e caminda di L.G. Smith Blvd, ta sinti cu nos ta temporada di Pasco y Aña nobo. E ta un contribucion cu APA ta contento di por haci pa e comunidad di Aruba.
Por a mira caba cu e trabou aki ta wordo aprecia, ya cu tanto local como turistanan ta probecha pa saca nan potret di fin di aña na e sitio aki. APA ta gradici tur su empleadonan y ayudantenan cu a duna un man den e proyecto aki cu ta un regalo pa e pueblo di Aruba.