Dia 4 di Februari ta net 40 aña pasa cu Anselmo Vrolijk a drenta den servicio di nos planta nacional, Tele Aruba. Sr. Anselmo Vrolijk tabata un persona hoben cu a drenta como camarografo y den e caso aki a eherce su trabao te cu awe como camarografo. Sr. Vrolijk a traha hopi aña pa TeleAruba y keto bay trahando part time na Tele Aruba. Es decir, sr. Vrolijk a cuminsa den e generacion di filmacion den frame, blanco cu preto, despues a pasa pa color y finalmente a drenta den e era digital. Tambe sr. Vrolijk a traha pa varios corant, entre otro La Prensa, Caribbean Speed Printers/Bon Dia Aruba. A traha pa varios otro medio di comunicacion conoci na Aruba. Logronan cu sigur ta keda den memoria di sr. Vrolijk lo ta momentonan cu el a comparti den el lucha di Status Aparte cu Defunto Betico Croes. Den e caso aki tambe ta corda momentonan bunita cu a logra yega nos mesun Status Aparte, a logra carga nos himno y bandera. Sr. Vrolijk pa hopi aña a siña hopi hende e trabao aki y ainda e ta educa. Awe dos di su yiu hombernan ta forma parti di planta nacional Tele Aruba, uno como camarografo y e otro como reportero di deporte. Sr. Anselmo Vrolijk keto bay ta den ramo di periodismo trahando y haci hopi reportahe, tanto na Aruba, como Corsou y otro partinan tambe. Sr. Vrolijk a traha den loke ta trata politica, deporte, suceso y tambe social. Sr. Vrolijk keto bay ta purba di educa, mustra y siña. Un logro cu el a logra despues di hopi aña ta “E lens di mi wowo” cu ta un proyecto pa celebra dia di prensa, pa asina haci un exposicion di potret di tur e fotografonan cu ta saca potret na Aruba, specialmente di prensa. Su meta pa e proximo añanan ta bin cu video y esaki kisas nos lo wak’e den e exposicion di 2017. Di parti di gerencia y staff di Masnoticia.com ta desea sr. Anselmo Vrolijk hopi aña mas den e trabao den prensa.