Federacion di Trahadonan di Aruba (FTA) y Air Navigation Services Aruba N.V (ANSA), a tuma por lo menos ocho luna pa negocia nan CAO, cual no tabata uno mucho facil
FTA y ANSA a negosha nan CAO pa aproximadamente 8 luna, uno no mucho facil, vooral na cuminsamento, segun CEO di ANSA, Nilki Kock.
Na momento cu a kere a yega na otro, na momento cu a pone na votacion cerca e trahadonan, mayoria a rechas’e. Despues ambos partido a bin bek na mesa, tirando awa den biña y na final a logra pa yega na un acuerdo cu ambos partido ta sinti nan bon cu ne. Ta un acuerdo cu riba na Aruba ta un win/win pa ambos, cu ta nifica toch, teniendo cuenta cu e circunstancianan actual di e compania, tambe teniendo cuenta cu e perspectivanan cu tin den e añanan cu ta sigui, ta un bon deal.
P’esey mes ta contento cu mayoria di e miembronan di FTA a vota pro na esaki. Ta pone un base tambe pa por sigui y crece como compania. Un di e puntonan cu ta bunita den e CAO aki tambe, ta cu aunke a yega na un acuerdo y di parti di gerencia a dicidi y den consulta cu FTA tambe, pa agrega den e CAO algo extra pa e trahadonan, unda cu condiciona cu si e situacion di e empresa, manera cu a bin ta desaroya desde september, pa loke ta e entrada ta mehorando, a palabra den e CAO, cu si e proceso di mehoracion aki manifesta den e prome lunanan den 2024, na maart lo paga un signing bonus adicional n’e trahadonan, Kock a remarca.
E CAO aki tin un validez di dos aña y lo vence dia 31 di december 2024.
MIENTRAS CU TIN TURISMO ANSA TA STABIEL
Mientras cu turismo ta crece, ANSA como compania y nan unico fuente di entrada, cual ta ANSA charge, cobra n’e aerolineanan, ANSA lo probecha di e desaroyo ey. Mientras cu turista ta bin Aruba den avion via e aeropuerto, ANSA lo sigui haya su entrada.
Durante pandemia a cera porta pa turismo, entrada a cay cu 95%. ANSA a keda cu trafico di carga. Esaki ta ilustra cu ANSA ta depende di e entrada di turismo. Mientras cu turismo ta bay bon, ANSA lo sigui ta stabiel.
Desde januari 2015 ANSA ta un compania exitoso. Ta un bon decision cu gobierno a tuma pa independisa e departamento, cu antes tabata cay bao di Directie Luchtvaart. Segun Kock cu e independisacion di ANSA, gobierno a spaar placa eynan y e clientenan, cual ta e aerolineanan a haya un miho servicio, cu trafico aereo mas sigur y tambe mas eficiente.
Cada dia ANSA ta mehora su servicio den termino di siguridad y eficiencia, Kock a remarca.
FTA CONTENTO
Presidente di FTA, Hose Figaroa a comenta cu di nan parti pa e aña aki, esaki tabata nan di 23 CAO cu a firma durante 2023. Pa FTA sigur ta un momento di satisfaccion. E negociacion a tuma su tempo, pero esey riba su mes, hustamente e partidonan a haci esfuerso hopi grandi pa yega na otro.
Na cierto momento a kere cu a yega na otro, pero mester a bay bek mesa, ahosta cierto partinan di e acuerdo. Pero na final, importante ta cu a yega na un acuerdo cu ta un win-win. Un acuerdo unda cu ambos banda ta sinti nan mes satisfecho, ta sinti nan mes contento cu loke a logra. P’esey a firma e CAO diabierna.
Cu esfuerso di tur a yega na algo cu no solamente ambos partido por ta orguyoso na dje, pero cu ambos por saca beneficio mutuamente.
Figaroa a splica tambe cu a pesar cu e partidonan tabatin acuerdo, na ultimo momento e empresa a mira cierto cifra nobo a drenta y a mustra cu cos ta birando miho, cu di nan parti a ofrece algo extra toch na e CAO, locual cu di parti di FTA ta mustra cu ta deal cu un partido husto, un partido fair, unda cu ta mustra cu kier comparti cu esunnan cu ta genera e entrada pa ANSA, cual ta e trahadonan.
Ta un gesto cu FTA ta aprecia. Por resumi henter e proceso aki den un solo palabra, cual ta Satisfecho.