E comunidad di Aruba a responde masalmanete na e yamado di Aruba Art Fair y a acudi na e prome charla di e artista urbano specialisa den Mozaik Isidora Paz Lopez durante un anochi informativo na Biblioteca Nacional.
Isidora Paz Lopez ta un di e 15 artistanan cu a bin Aruba pa e magno evento Aruba Art Fair, cual ta tuma lugar 16,17,18 di September den centro di San Nicolas. Isidora lo take over un edificio y di gran forma laga su stempel atras pa comunidad di San Nicolas y Aruba. Pa cual comunidad completo por bin contempla durante e 3 dianan di arte cu lo tuma lugar cu AFF.
Ta trata aki di un artista grandi den su genero cu a sa di acapara masha hopi atencion y un gran cantidad di voluntario cu ta yudando pa yega na e obra final cu lo hunto trece cambio y color den cayanan di San Nicolas.
Un di e fundacionan cu ta specialisa den Mozaik aki na Aruba ta Arte Mosa bao di liderasgo di Enrita Werleman y ta esun cu a aserca Aruba Art Fair pa inclui e artista di reconocimento Internacional Isidora Paz Lopez di Chile y lanta cerca dje atrabes di combersacionan y presentacion e interes pa cu e cultura di Aruba.
Paz Lopez ta conoci pa su record Internacional di 4 kilometer di intervencion urbano na Chile na unda el a traha pa un aña largo cu un grupo grandi di boluntario.
Cautelosamente e tema a wordo busca y lo honra diferente persona cu ta traha pa conservacion di nos flora & fauna dor di ilustra nan obranan. Durante Aruba Art Fair e personanan aki lo ricibi nan debido atencion. Ya caba e bankinan ta duna muestra di e beyesa di nos animalnan.
Trupiaal, shoco, barbulet, yuwana y mucho mas ta bin na bida den centenares di parti di tegels di tur sorto di color.
E artista Internacional Isidora Paz Lopez a scoge e edificio di Cosecha na unda den futuro diferente workshops lo wordo teni, pa desplega un intervencion urbano gigantesco cu ta representa un bailarina di Carnaval rondona door di barbuletnan.
P’esaki e artista a regala Aruba Art Fair 70 kilo di tegels di colornan yamativo cu el a trece especialmente for di Alemania pa e intervencion aki.
Tur esunnan cu kier presencia e trabao di e artista aki di cerca por bishita Aruba Art Fair e dianan 17, 18 di September na unda 150 artista local lo presenta nan arte y na unda musica, teatro, obranan artistico, declamacion, baile lo ilustra talentonan di nos hendenan.
Di tur parti di Aruba e interes ta lanta pa mas y mas boluntario pa asina participa den e diferente workshop y tambe yuda e artista aki finalisa su trabao.
Un danki special ta bay na UNOCA pa a haci e workshop aki posibel. Mas cu claro Aruba Art fair no por tabata posibel sin e sosten di Ministerio di Cultura, Aruba Tourism Authorities, TPEF, Departamento di Cultura, AAA, CMB, AIB, PWC, Sjien Fat Laywers, Ecotech y tur hotel partner Renaissance, Divi Divi, La Cabana. Pa mas informacion pa registracion pa workshops y pa informacion general por bishita www.arubaartfair.com .