Dia 20 di October, diavierna nochi, nos lo tin un anochi di informacion na Universidad di Aruba) Pa e dia aki nos studiante y docentenan ta prepara pa comparti informacion di Universidad y tambe nan experiencia na Universidad.
Awe nos lo kier comparti algun rason pa studia na Aruba y na Universidad di Aruba.
Nos por menciona hopi rason pakico studia na Aruba y na Univerisidad di Aruba, pero pa e biaha aki nos kier enfoca riba 4 punto. E 4 punto nan aki nos di Universidad di Aruba ta enfoca hopi riba dje y ta nos meta pa ofrece na tur nos studiante nan.
1. Excelencia academico: Universidad di Aruba ta ofrece un programa academico bon diseña. Nos ta considera e bienestar y exito di nos studiante nan hopi importante y p’esey mes nos ta hinca hopi tempo den e programa nan cu nos ta bin cun’e. Universidad di Aruba ta traha cu e meta pa saka e miho den cada studiante, pusha nan pa asina nan discubri potential y habilidad nan cu nan mes no ta sa cu nan tin. Lagando nan discubri esaki nan nos ta contribui na un experiencia educacional pa bida largo.
2. Guia personal y lesnan interactivo: Universidad di Aruba ta basta chikito den e cantidad di studiante cu ta atende den comparacion cu Universidad nan afo. Esaki ta trece cun’e cu e klas nan ta hopi chikito y e atencion cu nos docente nan ta duna na nos studiante ta casi riba nivel individual. Nos meta ta pa yuda cada studiante jega na nan meta y haci uso di nan maximo potencial.
3. Futuro Lider nan: Na e momento nan aki Universidad di Aruba tin un tiki mas cu 600 studiante, poco poco pero sigur nos ta creciendo den cantidad di studiante. Universidad di Aruba su studiante nan ta desaroya nan mes pa bira futuro lider nan di nos dushi Aruba mañan. Lesnan no ta solamente den klas, pero nos ta Brinda diferente oportunidad pa ta parti di e diferente clubnan cu nos tin. Manera Circle K, Toastmasters y nos studentenraad. Abo por siña pa ser un lider, desaroya bo manera di presenta abo mes y hopi otro caracteristica cu ta importante den bo Carera profesional.
4. Oportunidad Internacional: No paso bo ta studia na Aruba ta significa cu bo lo no por haña un tiki di e experiencia internacional! Universidad di Aruba ta ofrece hopi oportunidad na su studiante nan bou di e programa di intercambio internacional. No solamente nos studiante nan por bay riba un intercambio educacional den Europa y Merca pero tambe nan por bay haci nan pasantia den exterior.
Esaki ta e 4 punto nan cu Universidad di Aruba kier enfoca riba dje na e momento nan aki pero ainda tin hopi otro rason nan pa studia aki mes.
Pa mas informacion bishita nos website: www.ua.aw/programs, manda nos un e-mail: [email protected]. Of bishita nos Facebook page: University of Aruba y follow nos ariba Instagram.
Bin dia 20 di october 2017 y haya sa mas di Universidad di Aruba y tur su beneficio nan. Nos ta warda bo!