Pa recauda fondo pa yuda alivia e retonan social actual cu nos nacion ta enfrenta, artistanan local ta uni hunto cu Fundacion Family First pa un anochi di musica y celebracion.
Gradicido pa resultadonan positivo durante 2018, como tambe, e fundacion su programa pa 2019, Maestro di Ceremonia Sr. Leo Phillips lo presenta comunidad di Aruba na un anochi di gran variedad di genero musical canta pa nos propio artistanan local manera entre otro, Eltienne Yarzagaray, Jefferson Paris, Ramphys Tromp, Tabitha Smith – Heemstadt, Freddy Richardson, Ezekiel Anthony y Alberto Phillips, lo tuma luga dia 30 di November binidero den Crystal Theater.
E concierto lo cuminsa pa 7or di anochi y lo continua te cu 11or di anochi. Contribucion pa esaki lo ta solamente Afl. 35.00, y lo ta uno cu lo bay enteramente na trece un cambio den famianan di Aruba.
Den cuadro cu e vision di Fundacion Famia First “Famianan sano pa un Aruba prospero”, e fundacion ta sigui enfoca riba e importancia di relacionnan sano den 2019. “Nos ta kere cu un di e yabinan clave pa alcansa e proposito den bida ta dor di relacionan stabil,” directora di e fundacion Sra. Jennie Lion Sjin Tjoe ta enfatisa.
“Nos ta masha contento y gradicido na tur cu bay di acuerdo pa colabora esfuerso y pa por logra haya e fondonan nesesario pa logra ehecuta nos programa di 2019.”
Directiva di Fundacion Family First, conoci pa nan cursonan annual manera, Tatanan Campeon, Retiro di Pareha, Curso di Finansas, como tambe, Speransa despues di Matrimonio, ta sumamente contento cu e resultadonan anterior y ta premira un 2019 positivo y yena cu speransa.
E reaccion di e cursistanan tambe ta sumamente positivo. “Mi a sintimi asina comodo den grupo, cu mi tabata wak mi holoshi y pidi pa tempo para. Pa nos, hende homber tin biaha ta dificil pa nos expresa nos mes, pero e curso aki a yuda ami y otro miembronan di e grupo di tatanan masha hopi mes. E ta refresca bo perspectiva y ta inspira bo pa ta e miho pariente cu bo por ta, pa bo yiunan,” cursista di curso ‘Tatanan Campeon,’ Juan Carlos van den Berg a comparti.
“E retonan ta hopi, pero nos ta traha hunto cu otro instancianan riba e tereno pa contraresta e retonan familiar di nos pais. Tatanan Campeon, por ehempel ta un colaboracion di Fundacion Family First cu Stichting MOBIS. Tatanan ta cabesnan di famia cu sin duda tin resultadonan positivo of negativo riba e sigiente generacion. E meta ta, pa minimalisa mas tanto posibel cualkier influencia negativo pa cada miembro di famia y mira famianan sana y prospera. Esaki ta un di e motibonan cu nos ta haya importante pa reinforsa nos tatanan,” Lion Sjin Tjoe ta splica.
Y asina tin hopi otro colaboracion cu manera Traimerdia, Wit Gele Kruis, Voogdijraad, Departamento di Asuntonan Social, Fundacion pa nos Comunidad, Bureau Sostenemi cu ken Fundacion Family First ta opera a base regular, cu e meta pa sana famianan y logra un Aruba prospero. Abo tambe por contibui na Fundacion Family First su programacion pa 2019 door di pasa cumpra bo ticket pa bo y bo sernan keri. Ticketnan ta disponibel na Ladies Choice, Welcome Snack, Heavens Hair Studio, Friends of God Bookstore, CITGO L.G. Blvd., como tambe y CITGO Essoville.