Diamars 5’or atardi a drenta e tristo noticia cu baby Ronin a perde lucha pa keda na bida. E tabata na Colombia hunto cu su mayornan.
Baby Ronin tabatin necesidad urgente di ayudo. Instancianan di Aruba no kier coopera mas cu su tratamento medico, cu ta uno compleho. Pero su mayornan no ta entrega y a pidi ayudo, pa transport’e for di Colombia pa Merca cu Air Ambulance. Na Merca a haya un hospital cu a bisa di lo tum’e pa tratamento.
Su mayornan Gabrielle (Gaby) y Jermean, hunto cu famia y amigonan a bin ta organisa diferente actividad pa recauda fondo. Por mira nan para banda di caminda bisti na color licht blauw y nan caha pa ricibi donacion. No a logra yega na e suma necesario ainda pa transporta Ronin pa Merca, ora cu e lamentabel noticia a drenta cu e angelito a perde e lucha.
Ronin a nace tres siman prematuro y tur cos tabata mustra bon cu ne, treciendo hopi alegria no solamente pa su mayornan pero tambe pa resto di famia.
Algun ora despues di su nacemento, e alegria a bira un tristeza. A constata cu Ronin a nace cu un defecto serio na su curason pa cual mester di un operacion urgente pa salb’e. Dos dia despues a transporte cu Air Ambulance pa un facilidad cardiovascular na Colombia, ya cu Aruba no tin e facilidadnan y tampoco e dokternan pa yud’e.
Despues di varios siman y luna di test y transfusionnan, a bin descubri cu e tin un fayo den su Bone Marrow. E parti aki ta responsabel pa e produccion di sanger cora cu ta transporta oxigeno pa resto di e curpa, y sanger blanco cu ta lucha contra infeccionnan y “platelets” cu ta responsabel pa coagulo di sanger. E condicion di Ronin tabata exigi un transplante di bone marrow hopi rapido, sino e ta perde e lucha y fayece,” familiarnan ta bisa algun siman atras ora cu a cuminsa busca ayudo di pueblo. A splica cu mester di e transplante aki prome cu por opera su curason.
E mayornan a logra haya un hospital na Merca cu suficiente experticio y dispuesto pa tuma e caso compleho y mester transporte cu Air Ambulance mas lihe posibel. “Nos mester di boso ayudo pa duna baby Ronin e chens di sigui lucha. Sobrevivencia no ta garantisa. Tempo ta esencial. Nan seguro ta nenga pa cubri mas tratamento y ta urgiendo y hasta presiona nan pa bolbe cas y lague fayece. Pero e ta un baby feliz, cu un sonrisa cu ta gana curason di tur hende cu mir’e. Yuda nos yuda Ronin biba.”
No solamente a cuminsa busca donacion local pero internacional. Asina a crea riba www.gofundame.com un cuenta unda mundo por haci un donacion pa yega e suma di 250 mil dollar necesario. Te cu awe e donacion a yega na un poco mas cu 81 mil dollar.
Lamentablemente no a logra yega e suma y e angelito Ronin su forsanan di lucha tabata limita y awe el a bay descansa.
Na su mayornan y demas famia, ta bay palabranan di hopi forsa den e momentonan dificil aki.