POR, E Forsa Nobo, tin e gran placer su candidato nobo. Andriani Geerman ta un hoben entrepeneur cu a logra exito comercial riba su propio merito. Su lucha personal a hib’e na un causa y e deseo pa contribui na derechonan di nos tur pa escogencia liber den cuido.
Andriani ta un hoben profesional di 34 aña. Un homber cu di leu caba bo ta mira cu e tin su propio identidad, corda ora bo sera conoci y combersa cune. Su lombrishi ta dera p’ariba di brug y di chikito ela siña di e disciplina y satisfaccion di tin un propio negoshi. Despues di a termina EPI sector Horeca den e estudio di Hospitality Management, Andriani a sigui studia na Orlando Florida. Lamentablemente, malesa y fayecimento repentino di su tata a trece bek Aruba prome cu e por a termina su estudio, pero Andriani a saca lo maximo for di su entrada den mercado laboral, estrenando como e prome sushi chef Arubiano. Na 2012, Andriani a lanta su propio negoshi cu te dia di awe ta conoci como un di e miho – si no ta e miho – establecimentonan di sushi riba nos isla. No solamente pa e calidad halto y consistencia di e menu pero tambe pa e servicio y pasion cu Andriani ta inculca den su staf y hecho cu bo por mira cu e ta hinca su personalidad colorido den tur aspecto di e restaurant.
Pero e no tabata facil. Como hoben entrepreneur y doño di un empresa chikito, Andriani y su team a haña nan mes ta enfrenta reto y obstaculonan grandi riba su caminda. Banda di esey, Andriani semper mester atende cu su condicion di salud, locual ta haci su trayectoria den horeca – un sector cu ta tuma hopi di un persona fisicamente – asina hopi mas remarcabel. Hecho ta cu desde cu e tin 18 aña, Andriani ta sufri regularmente di inflamashonnan cronico na su curpa. Nunca ela haya un diagnosis fiho, pero segun dokternan e lo cay den categoria di personanan cu ta sufri di jicht of acido urico. Andriani su dolornan y inflamacionnan a sigui avansa y empeora, yegando na mas di 17 diferente luga riba su curpa. Dos dokter di cas, diferente internista, tres specialista den reuma y un bateria di test nunca por a duna un resultado definitivo di kico ta causando Andriani su enfermedad, corda na yega na un plan di tratamento. E dolor tabata insoportabel y e inflamacion asina debilitante cu Andriani no por a traha. Dependiendo riba su mes un biaha mas, el a cuminsa lesa y a haci su propio investigacionnan, buscando casonan similar y con otronan ta trata e tipo di dolornan aki. Tratando na compronde kiko ta pasa cu e curpa ora e ta den dolor y con por actua durante esaki. Poco poco e caminda nan mes a guia Andriani na cannabis medicinal como tratamento potencial pa su condicion. Andriani a haci tur lo necesario pa siña mas di e remedi di tera aki, pasando oranan largo ta lesa di otro casonan cu tambe a usa cannabis medicinalmente. A lesa y studia con e medicina alternative aki ta wordo uza pa combati otro malesanan, kico e efectonan secundario ta y a bin compronde mas di e diferente maneranan pa suministra e componentenan beneficiario di e mata aki den e curpa.
Andriani su conclusion ta cu mas y mas e evidencia nan ta keda mustra cu e uzo apropria y responsabel di cannabis por beneficia hendenan marea e cu ta sufri dia aden, dia afo. E ta haya cu a bira tempo pa esnan cu ta sufri di dolornan cronico, pero tambe di otro condicionnan cu lo por beneficia di uzo di medicina alternativo, busca nan derecho riba un tratamento cu por yudanan nan recobra nan salud y yega na un calidad di bida husto y digno. Pa e motibo aki, Andriani a dicidi pa pone un stap dilanti y representa den arena politico tur esnan cu mescos cune kier e derecho riba uzo medicina alternativo.
Como cu e mes tambe ta tata di famia – un yiu y un mas na caminda -, Andriani su posicion ta cu decriminalisacion y no legalisacion ta e caminda pa tuma. Decriminalisacion ta habri e caminda pa uzo estrictamente medicinal di e cannabis. Pues solamente si bo ta malo bo lo por consumi e producto aki den su diferente formanan. Ademas, decrimininalisacion ta habri caminda pa uzo medicinal sali for e circuito ilegal y pa mundo medico por incluye como opcion di tratamento en bes cu pashentnan mester busca nan tratamento riba caya. Ya caba Aruba ta conta cu un landsverordening na unda tambe ta habri caminda pa un entidad cu ta controla e calidad di por ehempel azeta di cannabis, percurando asina pa e calidad y aspectonan terapeutico di e remedinan aki keda constant y finalmente wordo prescribi. Pero mas ainda Andriani ta kere den conscientisacion y educacion riba e beneficionan di uzo medicina alternativo. Pueblo y instancianan mester ta consciente di loke tur ta posibel y kico no. Otro paisnan den region manera Colombia y recientemente Puerto Rico ya caba a decriminalisa cannabis, estrictamente pa uzo medicinal. Andriani Geerman y hunto cune E Forsa Nobo ta haya cu esaki tambe mester POR pa Aruba.