Pa medio di e Plan di partido POR, Vision 17-21, lo bay stimula crecemento di e economia di Aruba. Esaki ta e unico manera, historicamente preuba, cu lo funciona pa saca nos pais for di e abismo financiero den cual Prome Minister Mike Eman a hinca Aruba.
Lo introduci un ley di restauracion economico, kitando obstaculonan innecesario ora cu ta aplica pa por ehempel bouwvergunning, verkavelingsplan, of pa vergunning pa por habri un propio negoshi. Basicamente e ley aki lo haci posibel cu inversionnan priva por tuma luga na un forma accelera y asina crea cuponan di trabow y crecemento economico.
Ademas lo introduci un reforma fiscal pa mehoracion di nos clima di inversion, cual lo reduci varios belasting y pa sector priva lo nifica entre otro cu e “cost of doing business” lo disminui.
Ademas lo refinancia e debenan di pais Aruba na un interes hopi mas abou, creando espacio financiero pa aloca na otro areanan di gobernacion manera por ehempel salubridad, asuntonan social, deporte y educacion.
Banda di e puntonan menciona, lo introduci incentivonan fiscal, stimula creacion di un fondo di inversion y brinda e infrastructura necesario pa desaroya un sector economico nobo, enfocando riba companianan basa riba e economia di Internet (“E-business”), companianan fintech, y otro actividadnan economico innovativo.
Tambe lo concentra riba e plan “Maritieme Toekomst Aruba”, pa medio di cual lo bay entre otro registra mega yachts y otro barconan grandi, creando asina un pilar economico nobo, cual por ehempel pa e economia di Hulanda ta nifica como 1 biyon Euro anualmente.
Ademas lo promove entrepreneurship y brinda mas apoyo na empresarionan local, tanto den conocemento (legal, fiscal, laboral, etc. etc.) como tambe pa yuda facilita acceso na capital, promoviendo sistemanan alternativo di financiamento, manera por ehempel “crowdfunding”.
Di e forma menciona lo logra crecemento y diversificacion economico, creando entre otro empleo di calidad y prosperidad pa henter nos comunidad.