Un carta lo sali pa Presidente di Parlamento di Aruba como un follow up riba e reunion publico cu Parlamentarionan Andin Bikker y Marisol Lopez-Tromp a pidi siman pasa relaciona cu detencion di Minister Paul Croes.
Tambe lo bay pidi un audiencia urgente cu Gobernador relaciona cu e tema di detencion di e Minister y hecho cu segun nos Constitishon no ta existi Minister sin cartera. Ora cu e caso di detencion di Paul Croes a sali na cla, Prome Minister Eman a bisa na prensa cu mester cambia Aruba su Constitucion pa cu e Minister, admitiendo asina cu e posicion actual di e Minister sin cartera no tin base legal. Minister Mike Eman tambe a declara na prensa cu gobierno di AVP ta anticipando riba cambio di Constitucion pa cu esaki.
Pa loke ta e cambio aki Prome Minister Mike Eman mester corda cu e no tin mayoria den Parlamento pa haci esaki. Mester di minimo 14 miembro di Parlamento pa por haci un cambio di Constitushon y mester di aprobacion di Reino Hulandes. Esey ta haci cu e no por mishi sin mas cu Aruba su Constitucion.
Ademas pa loke ta detencion di e Minister, segun declaracionan di un abogado cu conoce e caso lo tin testigonan cu a declara incriminando e Minister. Pues loke mester tuma luga den concepto di mr. Andin Bikker, ta cu e fraccion di AVP mester realisa cu no por soporta un situacion asina mas, caminda tin un minister deteni den funcion pa cual no tin un base legal pa su posicion actual.
Hulanda tambe ta mira e situacion aki hopi di cerca. Siman pasa un Parlamentario Hulandes a puntra den un entrevista ki tipo di gobernacion tin na Aruba. Hecho ta cu tin un Minister den funcion deteni pa sospecho di labamento di placa y soborno referente mas cu mil y pico permiso, y ningun musca ta bula cerca AVP?