E Reglamento di Ordo (RvO) di Parlamento ta un ley vigente (AB 1990 no. 20) y ta prescribi cu un termino di cuatro dia di antemano mester wordo respeta pa por yama reunion publico, cual ta logico: mester prepara pa un reunion y parlamentarionan no ta mucha chikito cu mester core bin ora juffrouw fluit. Articulo 23 di RvO ta prescribi: “De oproepingsbriefjes worden, spoedeisende gevallen uitgezonderd, tenminste 4 x 24 uur voor het houden van de vergadering aan de leden verstuurd.”. Dus, a menos cu ta trata di algo sumamente urgente tin pa observa cuatro dia di pre-aviso pa yama un reunion. Den e caso di e reunion di diahuebs cu a pasa no tabata ta trata di un ley cu tin urgencia, e ley tin basta dia caba ta drumi na Parlamento y e tabata di bay wordo trata otro siman. Ta diripente a core hal’e pa diaranson atardi laat pa diahuebs mainta, un ridicules del otro mundo y ta mustra mala fe di parti di AVP cu obviamente ta controla e presidente di Parlamento cu nan a pone.
Probablemente a core hale paso minister Dowers tin miedo di reunion publico cu hopi miembro di oposicion presente. PDR no ta coopera cu tipo di wega infantil asina di parti di AVP, vooral no mirando cu e reinion a wordo yama contra un ley vigente, esta e RvO. Trabou di Parlamentario ta encera mucho mas cu reunion publico, vooral si no ta sostene Gobierno, por ehempel traha riba amienda of propuestanan di ley of bishita votadornan cu na final di dia ta esnan cu ta eligi un Parlamentario. Por puntra awe minister Mike Eman esey paso tempo e tabata den oposishon casi nunca e tabata bin reunion, su track record di ausencia grandi ta conoci. Pa colmo hasta awo cu e ta prome Minister desde su welga di hamber di Juli 2014 ta biaha so e ta biaha y ta rara bes e sa bin Parlamento.