Ta varios biaha caba cu Gobierno ta hunga e wega tristo di sconde documento cu ta instrumental pa e ley cu ta wordo trata den Parlamento: dia di e ley di All-inclusive a sconde un rapport bisando cu e tabata un “draft”. Awo Gobierno ta restringi acceso na documentonan integral di e ley pa re-apertura di e refineria bou pretexto cu lo tin informacion “confidencial” den nan, caminda cu a demostra Gobierno argumentadamente cu esaki no ta berdad pa loke ta trata tur of un gran mayoria di e documentonan. Door cu Gobierno a keda persisti den su terkedad y no ta prome biaha cu en corto tempo e wega cobarde di parti di Gobierno di sconde documentonan instrumental pa un ley ta wordo hunga, PDR a bin ta haciendo un analisis huridico di e leynan aplicabel y a bin conclui cu den opinion di PDR e hecho di basicamente y deliberadamente restringi acceso di Parlamentarionan na documentacion relevante of integral di un ley (“beslisdocumenten”) bou pretexto falso (cu lo ta supuesto “bedrijfsgeheimen”) lo ta castigabel paso e ta contra entre otro principionan di bon Gobernacion ancra den art. 43 di Statuut y Landsverordening administratieve rechtspraak, contra e obligacion di Gobierno pa informa Parlamento debidamente y e hecho cu ta stroba Parlamentarionan inecesariamente den eherce nan funcion. Paso pa ley ora ministernan deliberadamente (“opzettelijk”) no ta dunando ehecucion (“nalaten”) na leynan vigente e hecho aki por ta castigabel cu tres aña di prison mirando e.o. articulo 2:344, inciso 1 juncto 3 di Codigo Penal, y (den e caso aki) e historia di ley (“wetsgeschiedenis”) riba transparencia den gobernacion (“Landsverordening openbaarheid van bestuur”). PDR lo sigui profundisa su analysis legal y lo bay evalua kico lo por ta un proximo paso na defensa di nos Pueblo y nos Democracia Parlamentario. Ta di lamenta y un berguensa grandi cu Gobierno ta laga cosnan yega ta na extremonan asina a sabiendas cu gran parti di e documentonan referente e ley pa re-apertura di e refineria no tin informacion confidencial den nan y caminda ta falta respet na Parlamento y nos leynan vigente.