Den rueda di prensa di partido POR Andin Bikker a declara cu mester bin un reunion publico urgente den Parlamento pa trata e tema di criminalidad. E ta ripara cu tin cantidad di bijeenkomsten den Parlamento cu den su concepto no ta e tipo di reunion caminda mester trata un problematica di tal embergadura. Bikker a splica cu ora ta yama reunion nan di bijeenkomsten ta reunionnan por ehemplo ora ta invita Gobernador, ora un Parlamentario ta wordo huramenta, ora ta discuti riba temanan specificio y e ta un formalidad.
Andin Bikker a bisa cu awor aki tin hopi hende ta keda cuida nan mayornan di edad grandi na na cas pasobra nan tin miedo y ta mira cuanto atraco arma ta tumando luga den nan propio cas. Andin ta cuestiona cu pa colmo e minister di husticia a bin dilanti dialuna den Parlamento sin bin cu nada nobo. El a bin cu un tape graba desde 2012. Un reunion publico den Parlamento ta importante pasobra aparte di mocionnan di confiansa of desconfiansa tin instrumentonan cu ta hopi claro cu Parlamento por aporta na dje, manera a mustra den Parlamento dialuna.
Por ehemplo e Minister Dowers a papia di e ley di Admision pero e Minister cu ta trata asuntonan di admision na 2012 a presenta un concepto di ley na Parlamento cu ta pega te dia di awe pasobra e Minister ta bin cu diferente nota di cambio y te cu Raad Advies a bise cu e ta bin cu cambionan constantemente y di tal manera cu ta miho pa bin cu un proposicion di ley completamente nobo envez di cambionan detaya riba LTU.
Bikker a menciona tambe cu den e mesun reunion aki su colega Otmar Oduber a papia tocante un sistema cu ta tranca pa motibo di cambio di ley y segun e ta bisa obviamente Parlamento tambe tin un rol de e esaki.
Bayendo un tiki mas leu Andin Bikker a bisa cu e minister a bin dialuna na Parlamento pa disvia atencion un rato y cu cada bes e ta bin cu excuse y e ta argumenta cu door cu tin tanto hende ta traha carta di garantia esnan cu ta bin cu mal intencion pa haci atraco. Parti di esaki ta berdad cu esaki ta tumando luga pero tin un investigacion ta andado awor akinan riba un persona cu a duna mas cu 100 carta di garantia y aparentemente e ta hopi yega na e minister. Tin hopi rumor cu ta core rond cu tin trahadonan di imigracion ta haya nan mes cu no nan ta para hende cu no por drenta Aruba pero ta un telefon ta ring pa laga e persona ey pasa toch. Tipo di cosnan aki mester wordo investiga y cuestiona, y awor cu Parlamento a constata cu tin dos miembro di mes fraccion di Gobierno a dicidi cu via e asientonan cu nan tin y door cu nan tin nan dudanan ta pensando pa retracta nan sosten na Minister di husticia pasobra nada nada nobo a bin dilanti di su parti durante reunion di Parlamento. P’esey Andin Bikker ta insisti cu awor aki un reunion publico ta na su luga pa Parlamento debati riba e tematica akinan, pa bin cu mocionnan pero tambe pa wak con nan por acapara y atende cu e hecho cu tin leynan cu segun e propio Minister ta tranca.