Tin cu saca conclusion pakico St. Maarten si ta haya un trato preferencial of un trafo husto y pais Aruba no, ta pasobra, segun parlamentario Andin Bikker, te dia di awe, Reino Hulandes, no tin confiansa real den e maneho financiero cu Gabinete Mike Eman ta hibando. E no tin confiansa den dje. Sino, nan lo a dun’e e beneficio di duda.
Kico e refinanciamento di St. Maarten ta? Ta un debe cu nan ta suppose di paga caba, pero no a pone riba nan presupuesto pa pag’e. E ora nan a haya un prolongacion di cinco aña na 0.5% di cual 0.22 ta boeterente. Segun Bikker, sr. Eman, Gabinete Mike Eman II, lo haci bon di cuminsa recorda riba e Witte Donderdag Akoord, pa Aruba tambe haya un refinanciamento di nos debenan na un interes similar. Ta contento cu St. Maarten a hay’e, pero pa un trato igual den reino lo ta bon tambe pa pais Aruba, por baha nos servicionan di debe di 219 bayendo pa 230 miyon florin pa aña, pa bah’e di 4.5% averahe, te na 1% mes of 0.5%.
Parlamentario Bikker, ta splica cu na e Witte Donderdag Akoord, na April 2013, cu hopi fanfaria, sr. Eman a bin bek Aruba y a bisa cu el a firma un acuerdo cu Hulanda, caminda cu un di e puntonan di e acuerdo ta, cu Hulanda lo bay refinancia nos debenan na un interes faborabel. Interes faborabel ta cu awor aki cu tin hasta Alemania cu ta yama Negatieve rente, casi nan ta pagabo pa fia placa y pais Aruba ta pagando e ultimo emision di bono, na 4.5%. Prome cu esey tabata paga na 6.5% of 5.7%. Y si wak awor aki cu a firma un acuerdo na 2013, e acuerdo ey te dia awe, Raad van Advies, ta puntra con a para cu acuerdo. Presupuesto tras presupuesto. PDR tambe a cuestiona esaki den un pregunta cu nan a file pa loke ta presupuesto 2017. Awor aki, pa sorpresa ta mira cu pais Aruba ta keda demanda of no sa kico sr. Eman ta haciendo, ta wak cu pais Aruba a firma un acuerdo concreto, pero ta wak cu pais Aruba, te dia di awe, no a haya un interes preferencial y ta wak si cu nos pueblo mester paga entre 215 bayendo te cu 230 miyon florin pa aña na interes. Pesey ta bisa cu e unico cos cu PDR ta demanda ta pa e acuerdo di 2013 pa e wordo enforsa y respeta y ta referencia e ora na loke ta yama e Gelijksheid beginsel (e principio di trato igual den reino). Pesey ta remarca y ta haya remarcabel cu e fiansa aki a wordo refinancia na caminda cu e interes tabata caba na 2% y te dia di awe, pais Aruba, no obstante a firma un acuerdo. E acuerdo no ta obliga pais Aruba na nada mas cu fia na e interes eynan y e repago di e debenan. Claro mester trece finansas publico na orden. Esey ta e aspecto cu te dia di awe, e señal cu Hulanda ta duna, cu nan no kier refinancia nos debe pasobra nan no ta confia e maneho financiero, of miho bisa, no ta na satisfaccion te ainda.
E reapertura di e refineria a pone cu e presupuesto 2017, nan a haya como 60 miyon minimo eenmalig, un cos cu a kita cay for di shelo. E placa ey a drecha e presupuesto 2017. Si no tabata tin e 60 miyon aki, pais Aruba no ta ni den bista di cumpli cu exigencia di CFT. Imagina cu refinancia e interes di e debe di pais Aruba, cu lo por spaar hopi mas cu 60 miyon, pero no un biaha. Ta bay hay’e structuralmente, segun Andin Bikker.