Andin Bikker a elabora riba e hecho cu Gobierno cada bes ta propaga Aruba como hub pa economia y turismo, sin embargo e unico monopolio cu Gobierno tin pa traha leynan y cera tratadonan, ta netamente esun cu Gobierno no ta atendiendo cun’e, pa crea e ambiente, e clima di inversion pa por haci Aruba, enberdad un hub.
Parlamento Bikker a bisa esaki den contexto di un bishita cortico di PDR, den cuadro di su miembresia y e.o. for di foronan Latino Americano, PDR por a tuma nota cu paisnan manera Colombia, Chile y Peru ta expandiendo nan tratado di libre comercio cu paisnan rond di nan, como tambe Merca y Union Europeo.
E lider di PDR a menciona cu esaki ta haci cu aworaki na Colombia, p.e e tratado di libre comercio cu nan ta yama TLC, a expande na un manera cu el a crea un crecemento economico tremendo pa e pais, cu hasta aworaki nan tin un TLC cu Chile cu ta permiti cu productonan traha den e pais aki cu prima for di Colombia, ta haci cu Chile ta genera e producto final y ta pone su marca como producto Chileno.
Bikker ta mira cu esaki ta algo cu PDR pa hopi tempo ta bisando caba, den sentido cu Aruba no tin ningun tratado di libre comercio cu nos hermana isla Corsou.
”Di 2009 tin un cla pa firma cu tur e detayenan, PDR a manda copia di e documento na Parlamento hunto cu informacion, y recientemente atrobe pa Minister di Finansas, ken di su banda a pase pa su colega di Corsou pero no a mira ni un desaroyo riba esaki te ainda.
Nos ta kere cu e oportunidadnan di haci Aruba un hub comercial no tin cu keda den palabranan bunita y organisa forum y seminario, pero como legislador Parlamento cu tin e rol di hiba e lead den esaki y mester adresa esaki pasobra netamente, via ley y tratadonan den e caso aki, por crea e clima di inversion corecto, pa por fortifica y bisa cu di berdad bo kier Aruba como hub, of cu bo kier engrandece e rol di Aruba como hub, y no djis papia riba dje pasobra e ta zona bunita” segun Andin Bikker. Bikker ta bisa cu final di dia, un inversionista cu kier bin establece su mes na Aruba pa fungi como distribuido of creador di producto den nos zona franca, mester wak kico ta e tratadonan cu tin, cual ta e mercadonan di exportacion cu e por haci uso via e tratadonan aki, y via di Aruba genera productonan aki y exporta nan na diferente caminda, Esaki ta e dimension cu mester wordo explora; pero tambe e base legal via ley y tratadonan mester wordo fortifica. ”Esaki nos ta haya cu e gobierno aki ta fayando grandemente. Nan ta papia hopi pero ta haci poco, y na final di dia si bo papia hopi, netamente e grupo di inversionistanan di exterior cu nos pais kier atrae, nan ta keda wak pero nos clima di inversion y leynan no ta in place.
Aworaki por mira riba internet cu tin un rapport cu a caba di sali di Banco Mundial, na 2016 nan a haci un evaluacion riba crimen y inversion di mas cu 150 pais y hurisdiccion, y Costa Rica ta e di top cinco di leynan cu ta atrae inversionista.
Esaki ta un di e ehemplonan cu Aruba mester tuma, y haci na lugar di papia y organisa cada bes seminario durante shete aña largo, pero nada concreto. E tarea di gobierno ta, crea e clima di inversion via leynan cu ta duna contenido na locual nan ta papia. PDR den gobernacion ta bay traha seguramente, riba esaki Andin Bikker a bisa finalmente.