BEIJING, China- Han Zincheng a sobrevivi eventonan historico unda cu miyones di persona a muri: e invasion Hapones, e Guera Civil Chines y e Revolucion Cultura. Pero, cu su 85 aña, soledad y e miedo di muri su so, tabata su miedo di mas grandi.
Na December ultimo, e anciano a skirbi ariba un papel en blanco: “Buscando ken kier adoptami”.
E carta ta sigui: “Homber solitario den su 80. Curpa fuerte. E por haci compras, cushina y cuida di su mes. Niun malesa cronico. Hubila como investigado cientifico den un instituto na Tianjin, cu’n pension mensual di 950 dollar.
Zincheng a nenga di bay un cas pa anciano, su speransa tabata cu un persona di bon curason of un famia lo adopt’e, cu lo cuid’e den su biehes y lo der’e ora cu e muri.
Despues di a publica den luganan publico, el a bay su cas sperando e yamada di un persona cu e “bon noticia”, pero esaki no a yega. Zincheng tabata desespera pa tin compania: su casa a muri, e no tabata tin mucho contacto cu su yiunan y su bisiñanan tabata tin yiunan chikito pa wak pa nan y mayornan anciano cu tabata tin mester di cuido, segun e corant The Washington Post.
Zheng su condicion fisico tabata optimo. E tabata core su bicicleta bay mercado pa cumpra cuminda. Sin embargo, a pesar di ta un homber activo, e tabata consciente di cu mas tarde of trempan su declive, manera tur ser humano cu ta sinti e peso di añanan y e cercania di morto.
E tabata consciente di cu e ta solamente un di e miyones di Chinesnan cu ta yega biehes nan so y sin niun clase di yudansa.
Segun e corante Mericano, e progreso den calidad di bida di e Chinesnan y e politica di un solo yiu pa famia a cambia e piramide poblacional di e pais cu mas habitante na mundo.
Den actualidad, un 15% di e Chinesnan ta mayor di 60 aña. Pa 2040, segun The Washington Post, casi un kwart di e Chinesnan lo ta riba 60 aña. E realidad a haci cu e regimen Chines a tuma medidanan pa afronta e crisis demografico cu ta afecta, entre otro, su poderoso industria di manufacturacion.
Di otro banda, gobierno Chines na 2013 a crea un ley cu ta obliga e yiunan pa bishita nan mayornan. Pero den practica esaki no ta wordo cumpli cun’e y miyones di anciano ta biba den soledad.
E historia di Zincheng a bira conoci ora cu un muhe a haya e anuncio pega na e showcase di un tienda, di cual el a saca su potret y a publica esaki ariba rednan social. “Mi ta spera cu personanan di bon curason por yuda”.
Un programa di television a mustra interes den e historia y a sigui e storia di Zincheng. Desde e momento ey, y pa casi tres luna su telefon no tabata stop di ring. Esey a yena Zincheng di speransa.
Pa hopi aña el a purba pa hende skuch’e. E tabata bisa su bisiñanan cu e tabata sinti’e su so, cu e tabata tin miedo di muri, cu e no tabata kier a muri su so. Y awo hopi hende tabata acerca Zicheng preocupa pa e situacion.
Un simpel anuncio parce di a cambia tur cos. Danki na esaki el a cera un amistad telefonico cu’n studiante di ley di 20 aña. Un restaurant a ofrece cuminda gratis y un periodista a priminti di lo bay haci un bishita.
Pero Zincheng tabata tin su expectativanan halto y no tabata kier pa cualkier famia tum’e den adopcion. Y asina el a rechasa varios oferta cu no tabata na su gusto.
Tempo e tabata jong, mientras cu e tabata trahando den un fabrica, el a conoce su casa. despues, cu gana progresa, el a caba su scol secundario anochi y despues el a drenta universidad. Su yiunan a crece durante e Revolucion Cultural, un evento cu e kibra e famianan, segun The Washington Post.
“Chinesnan di mi edad a sufri bastante”, Zincheng a confesa.
Zincheng tabata anhela un biehes manera esun di su welonan, bou di e balornan Chines di antes, unda cu e famia tabata un nucleo solido. Unda cu yiunan, nietonan tabata cuida di e bieunan. Pa Zincheng, e regimen Chines mester haya un modelo nobo pa cuida y proteha e ancianonan.
E anciano tin dos yiu, di cual uno e tin poco contacto cun’e y otro cu a emigra pa Canada na 2003. Riba e pregunta di e periodista pa number di telefon di su yiunan, el a nenga, pasobra e no tabata kier pone nan pasa berguensa.
Tempo a pasa bay, winter a yega y e interes mediatico cu e historia a genera a baha, como tambe e yamadanan cu e tabata ricibi, cu tabata menos frecuente cada biaha.
Y asina, e miedo di muri su so riba cama, sin niun hende banda di dje, a bin bek. Zincheng a pasa e ultimo dianan ta purba conecta cu’n hende. Na februari, el a yama un liña di yudansa pa adultonan mayor cu ta purba di evita e suicidio den e poblacion.
E anciano tabata yama varios biaha pa siman. Sin niun hende cu ken e papia personalmente, e combersacionnan na e otro banda di e telefon, cu personanan totalmente desconoci, tabata un forma di desahoga su mes tocante su soledad y riba e situacion di miyones di adultonan mayor cu ta pasa e mesun situacion na China, un tema cu tabata tormenta Zincheng.
Na cuminsamento di maart, Zicheng a stop di yama e liña di contacto. Jian Jing, e hoben studiante di ley cu kende el a cuminsa un amistad, a bisa di a chat cu Zincheng pa ultimo biaha dia 13 di maart. Jing a haya un yamada di Zincheng e dia siguiente, pero e no tabata por a contesta.
Na cuminsamento di april, e hoben a yama e anciano, pero ya tabata laat. Un persona cu e no conoce a contesta e telefon: e yiu di Zincheng cu a informa Jing cu su tabata a fayece.
Despues di su morto, según The Washington Post, na un prome instante e yiu y e bisiñanan di Zincheng no a duna informacion riba e circumstancianan di su morto.
Fayecimento di Zincheng a pasa casi di manera inadverti na Tianjin. Solamente dos siman despues cu el a fayece, comitivanan di su bario a haya sa di e noticia. Cinco bisiña a nota su ausencia den e gangnan di e edificio, pero niun a bay check kico por a pas’e.
Han Chang, yiu di Zincheng cu ta biba na Canada, a biaha te China pa regla asuntonan di su tata y ora el a haya sa di e nota cu su tata a publica unda e ta pidi pa un hende adopt’e, el a rabia.
A pesar di su rabia, Chang a revela loke a pasa dia cu su tata a fayece: dia 17 di maart, Zincheng a bira hopi malo y el a yama un number desconoci, kisas un di su amistadnan cu el a haci, danki na e anuncio. E persona desconoci ey, di algun forma cu Chang no a specifica, a yud’e hibando e pa un hospital. Eynan, ora cu su curason a stop di bati, Zincheng a muri riba un cama, pero compaña.