Riba 1 mei 1890 a celebra en grande pa prome biaha DIA DI OBRERO cu demostracion grandi pa por yega na loke nos conoce awendia como 8 ora di trabou pa dia. E demostracionnan aki a tuma luga den paisnan manera Francia, Austria, Hungria, Italia, Spaña, Belgica, Hulanda, Dinamarca, Noruega, Suecia y Merca. E Ingles a organisa e prome diadomingo di mei un demostracion enorme. Den diferente paisnan Europeo e demostracionnan aki a termina den confrontacion cu polis.
Na Merca si e demostracionnan aki tawata exitoso unda cu a conoce e introduccion di 8ora di trabou pa dia, mientras cu den cierto rango di trabou e 9ora di trabou pa dia a keda introduci.
Durante e congreso di e Segundo Internationale na aña 1891 a wordo dicidi pa haci e Dia di Obrero un tradicion anual. Segun e congreso esaki tin 3 meta:
– Lucha pa logra introduci e 8ora di trabou pa dia;
– Lucha pa otro derechonan laboral
– Mantene paz
E derecho di un obrero a conoce hopi cambio desde introduccion di e Dia di Obrero.
Nos mester tuma un rato y para keto y reflexiona riba tur e derechonan cu nos ta disfrutando di dje awendia y alabes kico tur por wordo adapta y mehora pa nos Obreronan.
Riba e dia aki mi ta desea di manda un palabra di pabien pa tur nos OBRERONAN na Aruba pa a yuda y ta sigui yuda na e construccion di nos dushi Baranca cu nos ta yama Aruba.