WASHINGTON, D.C., Merca- E Departamento di Husticia Mericano dialuna a anuncia cu un analista externo a wordo deteni y ta wordo acusa di e delito di filtracion di informacion clasifica na un medio di comunicacion.
Departamento di Husticia a informa den un comunicado cu e contratista di inteligencia Reality L. Winner, di 25 aña a wordo deteni den fin di siman den e estado di Georgia y a wordo acusa di delito contra di siguridad nacional.
Winner tabata traha pa e compania Pluribus International y tabata autorisa pa maneha informacion clasifica como “Top Secret”.
Dia 9 di Mei, Winner a print informacion clasifica y el a saca esaki for di e instalacionnan pa despues manda esaki pa un medio di comunicacion, te ainda desconoci.
Asina mes, e detayenan di e acusacion ta indica cu investigadonan a logra haya e sospechoso ora cu nan a ripara cu e documentonan cu esaki a comparti riba su pagina web tabata tin marcanan di a wordo dobla.
Pa e motibo ey, nan a saca nan conclusion cu e documentonan a wordo manda via post y nan a registra kende a print e documento y a determina cual di e seis personanan identifica tabata tin algun contacto cu e medio cu a publica e informacion.
E medio digital The Intercept a publica dialuna documentonan di National Security Agency (NSA) unda cu ta duna detaye di e intento di parti di gobierno Ruso di ataca informaticamente esunnan involucra den e votacion Mericano, como tambe pa infiltra den e comunicacion di funcionarionan relaciona cu e sistema electoral.
Fuente: www.eldiario.es