Analisis preliminario di hayasgonan di un sitio arkeologico na St. Cruz ta duna indicacion cu e area di St. Cruz tabata ser habita den diferente fasenan den e Periodo Ceramico. Alabes, caracteristicanan di un deramento specifico di un mucha ta indicativo pa ritualnan funebre specifico haci den e fase mas tempran di e Periodo Ceramico.
Tabata riba un diabierna den luna di September aña pasa cu e Departamento Cientifico di Museo Arqueologico Nacional Aruba (NAMA) a haya un yamada di e sr. Karel Orman di Departamento di Trabounan Publico (D.O.W.) cu a haya locual tabata parce restonan di skelet. E restonan aki a ser haya durante trabounan di construccion na St. Cruz na e caminda cu ta bay na e scolnan basico di Colegio San Hose, Maria School y e misa di Immaculada Concepcion na St. Cruz.
Arkeologo y asistente di arkeologonan a investiga y den e area cu a coba, cu tabata midi 3 meter hancho y 18 meter largo, a haya un total di 7 rastro, cual tabata inclui uno di deramento y 6 marca di staca. E relacion entre e deramento y e marca di stacanan no tabata mucho cla, excepto pa un cu tabata ubica net riba y hasta tabata pasa door di e deramento. Di esaki por conduci cu ora cu a coba pa pone e stacanan, probablemente no tabata conoci cu tabata tin un deramento na e ubicacion aki. Esaki ta un indicacion cu e deramento probablemente tabata di un otro fase, mas tempran, den e Periodo Ceramico di e area specifico aki.
Loke tambe ta hopi interesante ta cu e restonan humano tabata cubri pa dos potchi cu tabata poni boca abou y di cual un tabata cubri e craneo y e otro e parti di e heup y pia. Un di nan tabata un ‘aripo’ basta grandi cu tabata poni riba e area di ribchi y bou di esaki a haya weso di pisca y material di cocolishi. Den e area di e pia ta unda a haya un marca di staca relativamente grandi, cual tabata contene resto di sas. Investigacion preliminario di e caracteristiconan di djente di e individuo ta categorisa e persona como un mucha di entre 6 pa 10 aña di edad
E hayasgonan aki ta indica continuacion den habitacion di e area di St. Cruz den diferente fase den e Periodo Ceramico. E caracteristicanan di e deramento por ta indicativo di e status social di e mucha y di ritualnan funebre specifico cu a ser haci durante e fase tempran (mas o menos 800-1100 Despues di Cristo) di e Periodo Ceramico.