Diaranson mainta, AZV a tene un conferencia di prensa riba un resumen di tur loke tabata e trabaonan cu AZV a haci den 2020, y tambe kico ta spera pa 2021.
AZV ta para keto na un momento hopi importante unabes cu aña cambia, 1 di Januari 2021, AZV lo cumpli 20 aña di existencia. 1 di Januari 2001 a introduci esaki, despues di casi 10 aña cu e ley tabata t’ey caba, a dura hopi prome cu a start. 2021 lo ta un aña di reflexion pa AZV, na unda tin cu puntra con lo sigui y di ki forma.
Pa AZV mes, nan kier wak esaki positivo. “Nos ta haya cu e idea di un cuido medico general pa tur ciudadano na Aruba ta un idea ainda noble, un idea hopi bon, pasobra cu tin hopi pais na mundo ainda ta bogando pa tin un tipo di seguro AZV den nan pais,” segun vocero Solange Tchong.
AZV ta subraya cu 2021 lo ta un aña cu ‘hopi sacrificio’ pasobra ainda ta mara na instruccionnan, y ainda como organisacion nan ta pendiente pa haya instruccion di kico mester bay tuma luga den 2021.
“Pero nos ta sigur si cu aunke 2021 ta bay ta un aña unda nos ta spera hopi cambionan, tog nos ta convenci cu e seguro AZV ta e miho cos cu Aruba por tin, si bo compara sector medico of sector di seguro cu otro pais den Caribe pero tambe mundialmente.”
AZV ta premira di lo confronta nan mes den 2021 cu un aña hopi dificil financieramente y tambe den logistica, pero sigur mester ta orguyoso di 20 aña unda a demostra un seguro medico pa nos ciudadanonan.