Pa hopi pais 2017 ta e aña di escogencia importante. E pueblonan di Hulanda y Francia a caba di scoge pa para e populismo cu a lanta tur caminda. Sur-Corea a scoge pa un presidente cu un posicion mas suave cu Norte Corea. Segun un politico Hulandes Corsou a vota contra mafia y pro un estado di derecho. Y mas laat e aña aki ta toca turno na pueblo di Aruba. ¿Ta scoge pa mantencion di status quo y pues ta limita na scoge entre e partidonan tradicional cu ta priminti monton di oro of ta scoge pa bon gobernacion? ¿Nos ta fiha nos mes mas tanto riba nos propio interes y nos ta na busca di privilegio cerca e diferente partidonan en cambio di nos voto of… eventualmente nos por considera tambe e ‘interes general’: kico ta miho pa nos pais y nos yiunan? ¿Den esey nos ta limita nos bista pa e 4 añanan venidero y nos isla chikito so of mas bien nos ta mira un generacion padilanti y den cuadro di nos relacionnan den Reino?
Cualkier escogencia cu nos haci, e resultado di e grupo total di pueblo lo tin consecuencia grandi pa e añanan venidero. Pesey ta importante pa nos decision personal no depende di solamente consideracion emocional (“Mi famia semper tabata AVP y pesey…”). Un momento di reflexion tocante e relacion entre calidad di gobernacion di e ultimo (4-30?) añanan y nos situacion actual por trece claridad den esaki.
Mescos cu hopi otro pais chikito y grandi, e situacion financiero di Aruba no ta nada di gaba. Naturalmente e pregunta ta: con bin? Tin motibo simpel di cual tur tin di haber cu e manera con a goberna Aruba. Por ehempel con a anda cu nombracion di personal y e placa disponibel y locual a fia. E dos partidonan grandi ta culpa otro di ta e causa di tur miseria pa motibo di a hiba mal gobernacion. ¿Pero…acaso e acusacionnan ta cuadra completamente of parcialmente cu berdad? ¿Y si tur dos tin razon, ainda nan ta merece nos voto? ¿Y si NAN no merece nos voto, ta KEN SÍ? ¿Partido nobo ta e solucion? ¿Di berdad tin diferencia entre e partidonan nobo entre nan y ‘esnan mas anticua’? ¿Cualnan anto ta e diferencianan y den kico nan ta distingui nan mes? ¿Hende ta drenta politica pa idealismo of mas bien pa saca probecho personal? ¿E partidonan mes tin suficiente knowhow pa logra un cambio real den gobernacion? ¿Y si esey no ta e caso, ta con nos ta haya esnan cu sí ta capacita pero no ta dispuesto pa drenta e arena politico?
¿Y con nos mes ta pensa tocante nos futuro relacion cu Hulanda y nos posicion den Reino? ¿Nos ta para tras di e partido cu ta grita cu mester termina e supervision di CAft lo mas pronto posibel? ¿Of nos ta contento cu Hulanda a interveni y a scapa nos di un caida liber den un abismo financiero? ¿Nos ta di acuerdo cu algun ‘control’ riba nos gobernacion local di parti di nos partner mas grandi den Reino of nos te kere ciegamente den capacidad y bon boluntad di nos propio gobernantenan a pesar di tur prueba di lo contrario? ¿Nos mes tin suficiente hende capas pa tur funcion importante of nos isla simplemente ta mucho chikito p’esey y ta necesario pa busca partner pa nos sigui desaroya?
Cualke escogencia cu nos haci, cada un tin consecuencia, manera pa un posibel cambio (necesario!) den nos orden legal, calidad di gobernacion, contenido y calidad di nos enseñansa, preservacion di nos medio ambiente y e desaroyo general di nos pais. Pesey ta importante pa pensa tur esaki bon den e lunanan benidero y si ta necesario, busca informacion.
Fundacion Gobernacion di Calidad Aruba kier duna un man den esey. Pesey e Fundacion ta publica e lunan benidero articulo cu ta duna un bista di e calidad di gobernacion di e ultimo añanan cu e consecuencianan pa nos pais. Asina e lector por determina si e diferente partidonan di berdad tabatin un balor adicional pa nos pais manera nan ta gusta alega. Tambe lo duna un ehempel di un orden legal cu posiblemente ta duna mas contenido na democracia. Pero e serie ta cuminsa cu diferente opcion pa nos futuro relacion dentro di Reino. Pasobra e exigencianan mas severo cu e partner mas grandi den Reino ta/lo (por) pone na nos participacion, lo bay determina cada bes mas e practica di gobernacion na nos isla. Consecuentemente, e escogencia pa e opcion cu nos lo scoge, ta determina pa gran parti e tipo di gobernacion cu lo guia nos isla durante e añanan benidero. Asina tambe nos mes ta duna contenido na nos propio futuro y di nos yiunan.