Aña 2016 tabata hopi exitoso pa stichting Monumentenfonds, segun Mircla Nava, Education,PR and Marketing Officer.
Nan ta hopi contento awor, finalisando e aña di wak cuanto proyecto a wordo haci e aña aki, tanto den area di restaurancion, mantencion y tambe area di educacion y concientisacion. Pa resumi algun di e proyectonan cu a haci, por ehempel e aña aki a pone hopi enfasis riba educacion. A guia studiantenan cu a haci nan afstudeer onderzoek, riba casnan di palo na San Nicolas. Un biaha mas a haci e minor project cu nan ta haci tur aña, cual a finalisa e siman aki, caminda cu e studiantenan ta presenta nan plan.
Tambe e aña aki a cuminsa cu un proyecto nobo cu yama “Nos Herencia.” Ta un proyecto caminda cu a acerca e scolnan basico. A duna informacion e aña aki na un total di 1200 studiante cu a siña un tiki mas di nos monumentonan. Esaki a cuminsa e aña aki caminda e scolnan ta haya informacion y ta finalisa na 2017 na Maart, caminda cu den forma di un competencia, e scolnan tin chens di gana 5000 florin, cual tin partnernan manera Unoca y Aruba Bank. Asina por wak kico e muchanan a siña y nan ta trece informacion bek.
Banda di esaki a haci realidad un buki di casnan di cunucu. Esaki a wordo skirbi pa studiantenan cu a haci nan afstudeer opdracht na Aruba, na 2014 y a logra haci e buki aki realidad danki na e ayudo di un grupo di boluntario. Nan a crea un buki cu yama “Het aanpassen van cunucu huizen aan de wensen van vandaag.” El a wordo imprimi y ta gratis via e website di monumentenfonds, cual ta www.monumentenfondsaruba.com.
Banda di esaki tambe, un biaha mas, durante e aña aki tabata tin un bon relacion cu EPI, caminda cu a haci proyectonan di entre otro caminatanan pa duna informacion na studiantenan. Tambe a finalisa un proyecto cu a cuminsa aña pasa. Nan a haci restauracion di e mecanismo original di lighthouse. E lens a wordo drecha, haci’e completamente limpi, unda cu tin actualmente e lens y mecanismo. Otro aña lo por mira esaki bek den forma di un exposicion cu ta bay ta trahando riba dje. E exposicion aki, ta pa bay diferente area pa por comparti e lens aki, e mecanismo y e storia di e faro, hunto cu e publico. Idea ta pa cuminsa den e Cruise Terminal, unda cu e turistanan por admira e piesanan original aki di e faro.
Tambe nan tabata tin luna di monumento, cual pa e ultimo tres añanan nan a bin ta organisando. Stichting Monumentenfonds so no por haci tur esaki. Nan ta un grupo chikito, pero por conta cu partnernan henter aña pa yudanan den e luna di monumento, tanto organisando actividad.