Riba dia 19 di December e clientenan di Cas Sjabururi a haya un invitacion special cortesia di Amsterdam Manor y a tuma lugar na Tulip Brasserie Restaurant. Esaki ta un cena tradicional unda cu pa di 10 aña consecutivo, Amsterdam Manor ta honra e fundacion aki y ta aporta na e mehoracion di e calidad di bida di nan clientenan.
Cas Sjabururi ta un fundacion cu a ser estableci dia 1 di Januari di 1988 y ta ofrece cuido, educacion y guia na personanan cu limitacion intelectual pa nan por desaroya mas independiente cu ta posibel, segun nan capacidad. Actualmente tur e habitantenan di Cas Sjabururi ta adultonan cu edadnan entre 30 pa 60 aña y cu casi no ta wordo busca pa nan famia.
E bunita gesto aki por parti di Amsterdam Manor ta pa reconoce e labor di e directiva di e fundacion aki, como tambe nan clientenan. Y asina, di un manera simpel pero significativo, haci posibel un anochi special pa nan, E cena a conta cu mas o menos 20 habitantenan di e Cas Sjabururi hunto cu nan leidsternan, y hunto nan por a disfruta di un rato ameno y di un cuminda excepcional.