Amistad cu Sergio den Festival di Buki pa Mucha

0

Un grupo grandi di autor di buki pa mucha y ilustrador ta bay duna contenido na e Festival di Buki pa Mucha 2018. Nan ta bishita scolnan rond Aruba den prome siman di november 2018. Tema di e edicion aki ta ‘Amistad’ y e lema ta ‘Amistad! Traha storia hunto’. Biblioteca a invita autor di Hulanda, Corsou y Boneiro, Colombia y Surnam y e grupo mas grandi ta nos talentonan local.

Biblioteca ta spera for di Hulanda; Mariska Hammerstein, Jeroen Hoogerwerf, Evelien van Dort, Danielle Schothorst. Di Corsou ta bini: Tio Ali, Chris Schorea. For di nos otro isla herman Boneiro ta spera Denise de Jongh-Rekwest. For di Surnam biblioteca a invita Indra Hu-Ramdas y di Colombia Pedro A. Vargas Alvarez.
Di Aruba ta participa un grupo bon conoci den mundo di buki pa mucha; Gino vrolijk, Richard Dabian, Sergio Tjie-A-Loi, Reginald de Palm, Liliana Erasmus, Diana Marchena, Robert Reeberg y Vanessa Paulina (artista visual y ilustrador).
E grupo aki ta bishita diferente scol for di dia 5 pa dia 9 di november.
Sergio Tjie A Loi a publica un buki di Opa Oscar aña pasa, e ta un musico, e ta compone cantica pa mucha y ta guia coro di mucha. E ta gusta lesa, skirbi stria y conta storia. Ta pesey e ta participa pa di tres biaha den Festival di Buki pa Mucha. Su mensahe ta ‘Kere den bo soñonan y haci nan realidad den bo bida’ manera e mes ta haci ora cu su talento, un soño y oportunidad ta bini hunto. Sergio ta wak bishita pa scol como un dushi oportunidad pa comparti su musica, canto, storia y comedia cu mucha. E ta gusta combersa cu mucha y cera amistad.

Comments

comments