Na prome lugar AMF ta lamenta cu atrobe un grupito ta pone Palo Marga y Drag Racing na Aruba den un luz negativo. Nos a tuma nota cu un persona a saca algun imagen di e parti abou na toren y tambe e parti pafo. AMF kier a aclaria riba speculacion y acusacion lansa den nos direccion.
Toren abou cu colchon y cortina. En berdad esaki tabata un espacio cu a wordo utilisa pa hospeda 2 persona aña pasa cu normalmente ta haci uzo di nan trailer nan. Pero absolutamente no manera cu a sali publica. Na Palo Marga tin 2 persona cu ya tin varios aña caba ta hospeda riba e tereno pa siguridad y mantene e facilidad, mirando cu e ta uno sumamente grandi. Door di trabounan di preparacion cu tabata andando na e facilidad en conexion cu One Cool Summer, e persona nan aki mester a haci cierto cambio nan temporal. Cambio nan asina ta sosode constantemente ya cu tin trabounan andando continuamente riba e facilidad. E 2 persona tin wowo 24 ora pa dia riba henter e facilidad y container nan ora di eventonan manera One Cool Summer. Esaki ta un precaucion mirando cu for di prome cu One Cool Summer caba tabata tin varios “boycott” tumando lugar riba entre otro scoreboards, sensors y un generator nobo cu a wordo cumpra algun luna prome pa F35,000.00. Despues di One Cool Summer 2016 e espacio abou di toren a wordo manteni cera pa motibo di trabounan plania pa convirti’e den un press box full ekipa. Airco a wordo instala y mesa nan a wordo traha pa nos miembronan di prensa.
Pallet dilanti toren y na e trapi. En berdad tabata tin klinkers riba e piso di e cura di e toren. Sinembargo, e trabou tabata uno cu nunca a wordo termina y menos di mita di e cura tabata tin klinkers y e resto tabata santo. Mirando cu nos lo “host” varios invitado nan tanto di Corsou y USA como tambe varios sponsor cu tabata tin hopi aña sin bishita of contribui cu Palo Marga, a dicidi di traha un area “VIP” rapidamente teniendo cuenta cu ya no tabata tin budget. Nos invitado y sponsors a disfruta di e espacio brinda na nan y a elogia AMF cu pa prome biaha nan por a experiencia drag racing di asina cerca na Palo Marga. Contrario na locual ta den e articulo, esaki tabata prome biaha cu e area aki a wordo uza como “VIP”. Locual ta e parti di trapi cu a wordo cera cu pallet, esaki ta simpel. Awendia tur hende sa cu pallet ta na moda y e ta barata of por nada. Y AMF a probecha di esaki pa asina cera e parti aki pa preveni nos muchanan di hunga bou di e trapi dal cabes y tambe trek op cu nan brasa nan abou di e trapi. Esaki a wordo haci pa prevencion. Despues AMF a ripara cu e ta sirbi como “opslag plaats” tambe pa por ehempel: verf, cement, etc etc. Pero ta ilogico pa bay asumi cu esaki ta un camber. Riba e imagen adhunto por aprecia e parti di e trapi cera cu pallet for di One Cool Summer cu a tuma luga na final di Augustus 2016. Ta warda 7 luna pa haci un observacion/preocupacion? Esaki ta prueba cu e grupito aki ta traha di “mala fe” y ta net nan kier pone Palo Marga den un luz negativo. Pa via di e disparate nan aki nan no por conta cu aporte di mayoria coredor cu si tin e deporte y facilidad na pecho y ta poco mas intelectual.
AMF ta sugeri e “grupito” cu ta lansa informacion nan negativo, tanto den media como tambe social media, pa tuma un posicion mas madura y tuma contacto cu AMF pa asina nos por atende cu boso preocupacion nan den un reunion priva. Tambe, Palo Marga International Raceway ta un facilidad cera completamente y cualkier persona cu drenta pa haci daño na su ekiponan, drenta pa haci uzo di e pista , of drenta pa habri portanan cu ta cera pa asina saca imagen cu camera sin permiso, lo wordo persegui. AMF ta combersando cu un testigo di e incidente di tuma imagen sin permiso cu tabata na e parti di Motorcross na e momento nan ey. Investigacion ya ta andando y e persona/personanan lo wordo persegui pa ley.
Pa conclui, AMF ta alerta tur hende cu e tereno di Palo marga ta uno priva y cu esnan cu ta drenta pa causa danjo na e facilidad ta causa daño na e deporte y lo wordo persegui. Tin investigacion andando den e caso di e noticia infunda cu a sali riba masnoticia.com y no ta descarta cu esnan responsabel lo wordo persegui pa ley. Atrobe kier a sugeri na e “grupito” pa nan pensa 3 biaha prome cu lansa informacion nan negativo y sin fondo den media. Nan no lo wordo tolera mas den futuro. Pa problema nan personal, acudi cerca e persona concerni. Na final di dia e daño ta wordo haci na Palo Marga y na e deporte di Drag Race. Awor cu e deporte a cuminsa mira mas sponsor y ta den un spotlight despues di un tremendo OCS2016. Adicionalmente, nos ta haci un yamada na tur medio nan di prensa cu ta publica noticia di Palo Marga pa por fabor busca e otro banda di medaya prome cu publica algo eroneo manera e caso aki. Nos porta nan ta habri pa cualkier pregunta of preocupacion cu prensa of cualkier persona por tin. Nos ta altamente agradecido na tur medio nan di prensa pa e trabou cu nan ta eherce y ta aprecia si por acudi na cualkier miembro di AMF pa informacion. E unico victima ta Palo Marga y e sport pa capricho di algun persona cu mente baho.
Nos kier a tuma e oportunidad aki di biaha pa anuncia cu IHRA point series ta cuminsa dia 7,8, y 9 di April. Pa acumula puntonan valido, coredornan mester tin nan membership 2017. Point Series Street Legal ta start sali diasabra awo dia 11 di Maart. Un saludo deportivo, AMF.