Aruba Airport Authority N.V. (AAA) den presencia di Minister di Turismo, Salubridad Publico y Deporte Sr. Dangui Oduber, e ekipo di Aruba Tourism Authority, e ekipo di American Airlines bou liderazgo di Sr. Nelson Cortes, Country Manager pa Aruba, Bonaire y Curacao hunto cu otro invitado a celebra e inauguracion di 2 buelo directo pa Aruba: Dallas, Texas y Chicago, Illinois.
American Airlines a lansa 28 buelo den su network di buelo e siman aki, brindando mas oportunidad pa biaha den Merca, Caribe y Sur America. E buelonan adicional aki pa Aruba ta sirbi como coneccionnan strategico cu lo conecta e mercado di Aruba cu varios mercado di interes na Merca.
AAA su Air Service Development Manager Sra. Jo-Anne Arends a expresa aeropuerto di Aruba su entusiasmo pa yama bonbini na e 2 buelonan aki pa Aruba: “Ansiosamente nos tabata en espera pa e dia aki unda den forma caluroso nos ta yama bonbini na e 2 buelonan cu lo ta di beneficio grandi pa nos isla. American Airlines ta un partner fiel y strategico pa 49 anja caba contribuyendo cu aproximadamente 139 mil pasahero pa anja pa nos isla. E compromiso pa continuamente expande e opcionnan di buelo pa Aruba ta admirabel y ta wordo hopi balora door di nos tur. E 2 buelonan a yega net na tempo pa e regalo di Pasco sorpresa pa cualkier pasahero! Nos ta hopi agradecido pa e aerolinea su confiansa den nos mercado local y nos ta ansioso pa yama bonbini na tur pasahero for di Dallas y Chicago pa Aruba!”
E festividadnan pa e celebracion inaugural a inclui un muestra di aprecio pa tur pasahero na ora di yegada, sigui pa e ceremonia oficial teni den aeropuerto su VIP-Room y e bolo tradicional, pero moderno como un highlight di e anochi.