Liberato Hoek, hefe di servicio di Ambulance ta splica cu ta asina cu for di 2018, riba 20 di November cual ta Dia Internacional di Mucha, nan tin un proyecto caminda ta pasa bishita diferente scol y instancianan conhuntamente cu polis y brandweer. Riba e vehiculonan di emergencia, hunto cu e departamentonan aki, enbes di bisti uniform di trabao nan ta bisti disfraz di Superheroes.
E meta tras di esaki ta pa mustra e muchanan cu riba e vehiculonan di emergencia akinan tambe tin superheroe ta traha tur dia, y cu ta nan amigonan. “Nos kier tog crea cu nan ta wak e personal di e departamentonan aki como nan amigonan na momento cu nan ta bin den contacto cu e muchanan”, segun sr. Hoek. Pa motibo di e pandemia, naturalmente esaki no tabata posibel pa ehecuta e aña aki dus pa no lubida riba e muchanan, a produci un video cortico caminda cu ta involucra e muchanan tambe den dje. A hinca un baile chikito den dje cual tabata e Jerusalem Challenge, y cierto mensahenan cu a wordo treci dilanti. E diferente mensahenan cu a wordo treci dilanti por ehempel cu muchanan cu pancarta den man bisando pa bisti maskara, laba man, y mesun mensahenan cu a wordo treci den pandemia, a laga e muchanan e biaha aki trece e ehempel aki dilanti.
Ta gradici e personal di e tres departamentonan cu a haci esaki posibel, sin lubida e muchanan mes cu tambe a wordo inclui den e proyecto, tambe un danki special na Emma school pa pone e scol, klas y maestro disponibel pa por logra realisa e bunita proyecto visual aki. Ambulance Imsan ta felicita tur mucha riba nan dia y ta pidi pa sigui tur medida di higiena pa sigui combati brote di Coronavirus riba nos isla.