Diasabra anochi San Nicolas a haya un atencion special unda cu tur presente por a pasa un anochi y a reina un ambiente di Pasco, alegria, union, paz y trankilidad. Esaki a tuma luga durante e evento di Ambiente Social di Fin di Aña.
Parlamentario Alan Howell tabata presente durante e gran evento aki y por a sinti e entusiasmo cu tabata biba entre tur esnan presente. El a gradici minister Glenbert Croes pa dune e honor pa hunto cu su persona, cende y inaugura e luznan di e Kerstboom di mas grandi na Aruba.
Como representante di pueblo y habitante di San Nicolas, Howell tabatin palabranan di gradicimento na gobierno, minister Glenbert Croes, San Nicolas Business Association y tur otro cu a coopera di un manera of otro pa e evento aki por tabata un exito. El a indica cu actividadnan asina ta contribui na trece e sentiment di union, paz y trankilidad entre e habitantenan di San Nicolas y tur esnan cu a bishita e evento aki, specialmente den e dianan di fiesta cu ta yegando cada bes mas cerca. “Keda pendiente pa e proximo”, Alan Howell a conclui.