Amazon su balor ta pasa 1 biyon dollar

NEW YORK, Merca- E capitalisacion di mercado di Amazon a yega 1 biyon dollar, segun CNBC. Di e manera aki, e compania a bira e di dos compania Mericano riba mercado bursatil pa yega e balor record aki, despues di Apple.
E prijs di cada titulo di e gigante digital a crece casi 2% te 2.050,5 dollar den negoshinan matutino, riba 2050.27 necesario pa yega e meta, prome cu el a cay bou di 2035 diamar atardi.
Algun analista ta considera cu e factor di e tendencia alcista aki ta cada biaha mas varia di carpeta di inversion di Amazon. Aña pasa, e compania di Jeff Bezos a introduci den e industria alimentario ora di a cumpra Whole Foods Market y a realisa avancenan electronico y logistico pa mehora su servicio di suministro. Di mes manera, e kier desafia Facebook y Google riba e tereno publicitario.
E compania a ofrece un crecemento destaca riba Amazon Web Services, segmento a bay dilanti cu casi 50% den e di dos trimester.
E balornan di Amazon a subi cu mas di 70% na 2018 y a crece dobel den e ultimo 12 lunanan, compara cu e aumento di 8% y 16% respectivamente, di e indice S&P 500, cu ta representa e mey miljard di companianan grandi cu ta cotiza riba e bolsa di balor di NYSE o NASDAQ.

Comments

comments