SHIRQAT, Irak – Un muhe Iraki di 39 aña, Wahida Mohamed, ta e persona di mas busca riba e lista di Estado Islamico. E muhe lo tin hopi morto di miembronan di ISIS riba su nomber. Esaki ta segun CNN.
Wahida Mohamed, tambe conoci domo Um Hanadi, ta yama su mes ama di cas y ta lidera un milicia di mas of menos 70 persona cu a lanta contra hechonan terorista di ISIS. E grupo ta opera for di e ciudad Iraki Shirqat. Mientras tanto, el a yuda trupanan di Gobierno pa libera e ciudad di ISIS.
Mohamed a cuminsa na 2004 cu e lucha contra terorismo hunto cu servicionan di siguridad Iraki y coalicion. Akinan el a baha su rabia riba nek di al-Qaeda, cu despues a bira ISIS. Mohamed a haya menasa di lidernan di ISIS sperando cu e lo stop cu su lucha. Asina mes, el a ricibi menasa di e lider di ISIS, Abu Bakr al-Baghdadi. “Pero mi a nenga. Mi ta para riba top di nan lista di mas busca,” e luchado contra terorista a bisa. Um Hanadi mes tabata blanco di atentadonan na su cas. “Na 2006, 2009, 2010, tres autobom na 2013 y 2014.”
Hasta el a scapa algun biaha di morto. “Seis biaha nan a purba di matami. Mi tin scherfnan di granat den mi cabes y pianan y algun di mi rebchinan a kibra.
Algun hende rond di dje tabata tin menos suerte. Su prome casa a muri durante lucha. Mas na principio di e aña aki, su di dos casa tambe a muri den e lucha contra ISIS. tambe su tata y tres di su rumannan a muri. Pesey e ta tuma vengansa. “Mi ta lucha contra nan, decapita nan, mi ta cushina nan cabes y kiba nan curpa. Wak riba mi pagina di Facebook,’ Wahida Mohamed a bisa cu orguyo. Si tur cos ta klop, no por bisa asina. Mientras tanto su profiel a wordo removi for di e medio social.
Fuente: De Telegraaf