Diasabra anochi, mi a acudi na e Ceremonia di Graduacion di IBERO American High School na San Nicolas. Un anochi hopi special y emocionante, unda cu mi tabatin e honor pa otorga diploma na e 41 graduadonan. E logro di e studiantenan ta e refleho di nan trabou duro, perseverancia, dedicacion y determinacion. Durante e ceremonia, mi a hiba palabra, unda cu den nomber di Minister Endy Croes y mi persona mi a felicita e graduadonan cu e logro aki.
Esaki sigur ta marca e comienso pa mas logro. Mi ta encursaha e alumnonan pa sigui studia, sigui siña y sigui desaroya nan habilidad- y talentonan pa nan por logra nan meta y den futuro por contribui na desaroyo di Pais Aruba. Ta tarea di Gobierno di Aruba pa inverti den enseñansa y crea plataforma cu ta brinda oportunidad na tur ciudadano pa por educa y desaroya nan mes. Como parlamentario ta mi deber pa controla pa esaki ser haci debidamente. Na final di e ceremonia, a reconoce e miho graduado di IBERO American High School, esta Merrily Farro, kende ta e prome Arubiano pa logra esaki. Mi ta gradici director Sr. Andy Centeno, staf, docente- y mayornan cu a sostene nan yui den e proceso aki. Mi ta felicita e 41 graduadonan cu a ricibi nan diploma. Alabes ta desea nan hopi exito den e siguiente etapa di nan estudio. Masha pabien klas di 2024!
