E alumnonan di Rayo di Solo Kleuterschool a conmemora, hunto cu Fundacion Epilepsia Aruba, e hecho cu dia 26 di Maart ta Dia Mundial di Epilepsia. Como cu e fecha a cay riba un diadomingo, a dicidi di organisa un evento e diabierna prome.
Celia Ponson-Bernabela, cabesante di Rayo di Solo Kleuterschool, a remarca cu e alumnonan a disfruta di e dia, pero mas importante tabata cu nan a canta un cantica y ta desea pa tur hende cu tin epilepsia haya alivio di nan condicion.
Epilepsia ta un trastorno cronico, di cual e caracteristica principal ta atacanan cu ta ripiti sin provocacion. Hopi hende cu tin epilepsia tin mas di un tipo di ataca y hopi tin otro sintomanan di otro problemanan neurologico tambe. E celebro ta e fuente di epilepsia humano.
Epilepsia ta e di 4 trastorno neurologico mas comun y ta afecta personanan di tur edad. E ta un “spectrum condition”, o sea ta existi un cantidad grandi di diferente tipo di ataca, y ta varia di persona.
Na Aruba Fundacion Epilepsia ta traha pa promove conscientisacion y comprondemento pa cu e condicion. Tur aña ta conmemora Purple Day y durante di aña ta organisa sesionnan di informacion na e scolnan.