Conseho di Minister a aproba nombracion di Alto Comisario interino sr. Andrew Hoo, como Alto Comisario permanente. Sr. Andrew Hoo ta ocupando e puesto di Alto Comisario interino di nos Cuerpo Policial desde april 2018. Bow di guia di sr. Hoo nos Cuerpo Policial, den cuadro di un maneho integral, a logra trece mas tranquilidad y seguridad dor di entre otro mas visibilidad di Polis den nos comunidad, areanan comercial y turistico (TOPPS), controlnan severo y reduccion substancial di e cantidad di atraconan arma.
Tambe a percura pa mas material di trabow moderno pa miembronan di KPA. Conjuntamente cu ministerio di Husticia y Departamento di Recurso Humano a logra optimalisa e ciclo di promocionan (bevordering) y reconocimentonan, cual varios tabata pendiente pa hopi aña. Desde cu Minister di Husticia mr. Andin Bikker a restitui e poder di control di ley di LTU na 2018 pa ful Cuerpo Policial uniforma, bow mando di Alto Comisario Hoo esaki a resulta un exito den control y combatimento di permanencia di personanan cu no tin permiso pa ta riba nos isla. Durante su periodo como Alto Comisario sr. Hoo a sa di gana e respet y establece bon contacto di trabow cu agencianan Hudicial di Merca, e mercado principal di nos bishitantenan turistico.
Tin varios otro proceso positivo andando, manera entre otro mudamento di varios departamento pa un compleho mas grandi y adecua na Wayaca, un cantidad substancial di motorcycle nobo pa e motor unit, un propio radar pa KPA, cualnan, entre otro den bon comunicashon y consulta cu sindicato SPA, lo sigui adelanta pa bienestar general di KPA y nos isla.
Ministro di Husticia mr. Andin Bikker ta gradici e Comishon di conseho cu a hiba e proceso di solicitud pa Alto Comisario. Tambe e minister ta gradici tur otro candidato cu a solicita, cada un cu nan propio excelencia di servicio y meritonan altamente aprecia, pa e interes demostra pa e funcion importante pa cu e seguridad di nos isla.
Minister Bikker ta felicita sr. Andrew Hoo y nos Cuerpo Policial y ta gradici nan un bes mas pa e tremendo trabow di protehe nos comunidad y nos bishitantenan.